China o Pak mitkartemi teloktep terenemshitsü sentong agir

Beijing, April 09 (Agencies): China aser Pakistan linük indang air force mitkartemi teloktep mitkar terenemshitsü sentong agitsü tenzükba osang ka China’er defence ministry-i tanü, Honibar nü metetdaktsüogo.
Par linük ana indang mitkar tali tashi itshia alitsü aser par mitkar rong nung tesendaktep junga lidaktsütsü nükjidong nung tan teloktep mitkar teremenshitsü sentongji agiba osang jangjaogo.
“China’er air force-i alima linük ajunga indang mitkartem den amaliteptsü renema lir,” ta shia, tan tenzüba Shaheen V mitkar terenemshitsü sentongji tan April ita 30 nü tashi agitsü renemba olen ka ministry-i metetdaktsü.
Taliban aser al Qaeda telok na densema, Pakistan-i par Afghan arrtsülen, Pashtun tesem nung tentetba telungpur telok ajunga makdoktsü asoshi China-i mapang talangka nungi Pakistan ajungshia lir.
Pakistan-ia US, France aser China nunger nung tesüiba mapang yangluba fighter jet tayimtsütem melena tanü putu nung yangluba jet tayimtsütem amshitsü alizüng ayuba osang jangjaogo.
“Pakistan air force-i US nung yangluba F-16 tayimtsü timba amshir. Ajisüaka, tanü putu nung yangluba tayimtsü tajungtem alizüka amshitsüsa ozü rongsen jenjang junga maliba yong China den aroki lungjemer JF-17 fighter jet tayimtsü yanglutsü sentong lir,” ta Pakistan air force lenir, Muhammad Ashfaque Arain-ia osang jangjashitsüogo.