China o Pak nati J&K dak sendakba nung jembiba India-i magizük

New Delhi, Rongjui/September 10 (Agencies): Jammu and Kashmir dak sendakba nung China aser Pakistan nati hopta tatemi olen ka benokdangba India-i Mongolbarnü magizük. Linük ana yagi ashiba agi, J&K nung mangatettep aliba ken o ya alemli nungi lir aser iba ken o ya sensaksem ajanga kati ka den akhümtsübutepa lemtettsü nüngdaker.
“Chinese Foreign Minister-i semdangba sülen Jammu & Kashmir dak sendakba nung China aser Pakistan nati külem sangdong ka agütsüba ya onoki magizüker. J&K ya India nung shilem ka lir,” ta Ministry of External Affairs otongdar Raveesh Kumar-i Mongolbarnü ashi.
New Delhi-isa linük ana dang Pakistan-i atsünger aliba Kashmir adena China Pakistan Economic Corridor yanglua aliba anentsü metetdaktsüogo. “Onoki iba mapa inyaka aliba lokti tang mapa anentsü metetdaktsür,” ta Kumar-i ashi.
‘China Pakistan Economic Corridor’ dak sendakba nung India-i China aser Pakistan na prongla dang tebilemtsü kaa bilemba metetdaktsüogo, kechiyong iba tesem ya India meyong lir koba Pakistan-i 1947 küm ozüng alema atsüng.
“Pakistan-i atsünger aliba J&K dak sendakba nung status quo melenshitsü asoshi bendanger linük kati inyaksangshiba ajak India-i anemtsü bangzüngogo,” ta Kumar-i ashi.
Chinese Foreign Minister Wang Yi, shibai Pakistan semdanga liasü pai linük ana tsüngda tesendaktep ya kanga takang lir aser raksatsü makoktsü ta shiogo.
Islamabad-i mepeshiba sülen India-i Jammu and Kashmir nungi Article 370 aginba dak sendakba nung China-i United Nations Security Council senden ka amentsü asoshi ayongzük. Ajisüaka iba senden nung India pusemer anen.
Pakistan Ato Kilonser indang office nungi sangdong ka ajanga ashiba agi, Khan-i Wang den ajurutepba mapang China den tesendaktep ya Pakistan foreign policy nung tongtibang nükdang ka lir ta shiogo. Paisa, linük ana tsüngda ‘all-weather strategic cooperative partnership’ ya akhümtsübu aser temulunglemtepba dak yangloka lir ta shiogo aser iba tesendaktep ya iba tesem aser tanga tesem den yimjung tamendakdak lir, ta ashi.