China o Russia nati Sea of Japan nung mitkar terenemshiba sentong agitsü renemer

Beijing, July 30 (Agencies): China o Russia nati teloktep navy aser air defense mitkar terenemshiba sentong ka Sea of Japan nung agitsü renemba osang ka China sorkari tanü Brehostibar nü metetdaktsüogo.

China-i mangatettep ken o adokba South & East China tzüyim nung par mitkar tashi tali itshitsü asoshi inyakba maparen anema nokdaktsü nükjidong bener US-i kasa region nung tentetba linüktem den mitkar tesendaktep tajungba küma yanglushitsü tenzükba mapang ka nung China o Russia nati tan terenemshiba sentongji agitsü renemer lir.

United Nations Security Council (UNSC) nung telemtetba agitsü nokdangtsü mesüra agizüktsü tashi abenba linük ana, China o Russia nati Syria den sentakba ken o densema UNSC-i benokba onük aika nung opang ka süa tanüngba UNSC züngsemtem den toktepba osanga bushiteta lir.

“Taruba August ita 20-28 tashi agitsü renemba teloktep mitkar terenemshiba sentong ya Russia’er Vladivostok yimti tsütsülen, Gulf of Peter aser Sea of Japan na tsüngda densemba tzüyim nung agitsü renemogo,” ta China Defence Ministry otongdar, Yan Yujun-i tanü metetdaktsü.

Paisa ashiba agi, anti-submarine aser anti-ship terenemshibaren agitsü maparen nung China mitkartemi par fighter jet tayimtsü, destroyer rong aser mitkar osettsüset abenba rongtem amshia shilem agitsü renema lir.

Russia mitkartemia dispatch aser submarine rong den külemi, fixed-wing tayimtsütem yoka iba sentong nung shilem agitsü renemba osang jangjaogo.

“China aser Russia napronglai helicopter tayimtsü aser tzüyim sepaitem yoka tan agitsü renemba teloktep mitkar terenemshiba sentong nung shilem agitsü,” ta Yan-i ashi.

Ajisüaka, China o Russia nati par teloktep mitkar terenemshiba sentong agiba ajanga tang China den East China Sea den sentakba mangatettep ken o benoka aliba Japan linük kanga jashidaktsütsü ana nung lir.

Par linük anapronglai par meyong ta züngokba East China Sea nung tzüyim telung nungi totzü aser gas agitettsü asoshi sabang renemba maparen anentsü tetuyuba ka Japan-i taoba hopta China nem agütsüba osang bushiteta lir.