China o Saudi Arabia nati Yemen sorkar nungita yaritsü nangzüker

Saudi chuba, King Salman (Achiji) aser China Tir, Xi Jinping nati nati Riyadh nung agiba pela agizükba sentong nung aroki shilem agiba noksa ka yangi angur. (Riyadh, January 20)

Riyadh, January 20 (Agencies): China aser Saudi Arabia sorkar nati Yemen sorkar nungita yaritsü tenangzükba olen ka tanü Bodbar nü metetdaktsüogo.
China Tir, Xi Jinping-i tan mezüngsüa Saudi semdangdang par linük anati aroki lungjemer Yemen sorkar maneni yaritsü tan nangzükshir lir.
Xi-i Saudi semdangba sülen Egypt aser Iran linük nata semdangtsü sentong renemba osang angazükogo.
Saudi-i aniba teloktep mitkar telok kati yaküm 2014 küm nungi tenzüka Iran-i nungitba Shiite Houthi telok anema tongpang rara Yemen sorkar den yariteptsü tenzüka lir.
Houthi teloki tashiyim agi Sanaa yimtiba agiba sülen Yemen Tir, Abd-Rabbu Mansour Hadi aser pai aniba Yemen sorkar tang par linük anülulentip tsütsü, Aden yimti nung amenoka lir.
“Yemen nung telungjem alitsü aser peisasa pei madak yimsü asütsü temeten kümzüka ayutsü maparen nung ozü linük anati Yemen sorkar maneni nungita yaritsü nangzüker,” ta Xi aser Saudi chuba, King Salman bin Abdulaziz na tenüng nung China foreign ministry, otongdar, Hong Lei-i tanü sangoktsü.
Yemen nung tentetba tamangba yimsü, yimtenren aser iba amala telok tentet ajunga lungjema alitsü aser par linük tensa tamajungba akümtsüsa telemtetba magitsü tayongzükba ka pai sangoktsü.
“China-i Yemen nüburtem jenjang tajungba kümdaktsütsü aser Middle East ajunga nung tensa jungdaktsütsü asoshi teti bilemer,” ta shia, Yemen nung tongpang raraba anena par linük yimji yimjung alitsü imlaba olen ka Lei-i lemsatep.
China-i taoba mapangbo Middle East indang tensa tajungba kümdaktsüsü maparen inyaktsü asoshi tanüngba United Nations Security Council (UNSC) nung teti asoshi züngsemba linük 4 – United States, Britain, France aser Russia nunger dak imla aru saka par linüki tanübo Middle East, talisa Syria nung tensa tajungba kümdaktsütsü maparen nung tongti shilem agi tenzükogo.