China osettem nokdangba ajanga tesendaktep raksatsü: China

New Delhi, October 27 (Agencies): India nung tentet kari tan Diwali benjung mapang China nungeri yangluba osettsüsettem malitsü tayongzükba agütsüba sülen Brihostibarnü China-i, item ama mera agiba ajanga linük ana tsüngda amalitepa inyakba tesendaktep raksatsü, ta ashi.
China-isa, “Item ama tenokdangba ajanga parnok export nung kangabo mekongshitsü, saka China nunger osettsüset nokdangba ajanga takoksa tuluba angurtemjibo India nunger shishilembartem aser talirtem asütsü,” ta ashi.
Tanü New Delhi nung sangdong ka ajanga Chinese Embassy-i, alima nung osettsüset shishilembaba linük tulutibaji China lir, aser 2015 küm China-i bendangleni export asübaji US sen billion 2276.5 liasü, ta ashi.
“China nungeri yanglutetba osettem export asüba noklang shilem nung India dangi export asüba shilem 2 dang liasü, anungji India-i China nunger osettem nokdangba ajanga China shishilembaba nung kangabo mekongshitsü,” ta parnokisa ashi.
“Tenokdangba agütsüba ajanga China company temi India nung sen intokba nung kongshitsü aser linük ana tesendaktep raksatsü, aser ibaji China aser India nunger napronglai maginer,” ta kasa sangdong nung shia lir.