China PLA nungi telok kati Indian ketdangsertem ajuru

New Delhi, February 23 (Agencies): China People’s Liberation Army (PLA) nungi züngsem 15-i akumba teshimtet telok kati New Delhi nung India sepai ketdangsertem ajurua senden amen, aser iba senden nung linük ana tesendaktep atema arrtsülen yimjung nüngdak, anungji arrtsülen yimjung atema inyaktsüla ta bangjem.
Indian Foreign Secretary, S Jaishankar-i tang China yimtiba, Beijing semdanga aliba mapang ka nung PLA Western Theatre Command-ia February 21- 26 anogotem nung India semdanger.
Vice Chief of Staff of Headquarter Western Theatre Command (Chengdu), Major General Zhao Jin Song-i aniba PLA teloki yashi Army headquarters nung arrtsülen mapa lemzüka aliba Indian Army ketdangsertem ajurua onük aika jembiogo.
“Linük anatsülen nungi onük aika nung o lemtepogo aser linük ana terenlok aser tesendaktep maneni aintsü atema arrtsülen yimjung nüngdak ta bangjemogo,” ta Indian Defence Ministry-i sangdong ka ajanga metetdaktsü.
Kasa sangdong nung, “Linük anatsülen nungi lenirtemi linük ana tsüngda ken o jembiba den külemi Border Personnel Meeting-a nüngdak ta bangjem,” ta shia lir.
PLA-isa Agra aser Kolkata-a semdangtsü.
Yaküm November ita Pune nung India aser China army tem külemi joint training exercise agia liasü.
Tanü Beijing nung India aser China na nungi lenirtema senden mena linük ana tesendaktep atema jembiogo.