China Premier, Li-i British Chancellor, George Osborne den ajuruteper

Beijing, September 22 (Agencies): China Ato Kilonser, Li Keqiang-i British Chancellor of the Exchequer, George Osborne den Beijing yimti nung yashi Hombar nü ajurutepa senden ka amenba osang jangjaogo.
“Li o Osborne nati yashi Beijing nung ayonga amenba 7 buba China-UK Economic & Financial Dialogue (EFD) senden tezülen ajurutepa jürila senden ka menogo,” ta China sorkari ketdang asüba Xinhua osangi metetdaktsü.
Alima sabang nung tongti shilem agir linük ana, China o Britain na tsüngda rongsenren tesendaktep tajung yur amalitep lia inyakba ajanga alima indang rongsenren jenjanga tajungba akümtsü ta Li-i yashi lemsatep.
“Ozü China sorkari shishilembabaren ketdang asübaren tajungba küma inyaktsü temulungtetba ayuba den külemi, kechisarena ajunga nung terenlok lidaktsütsü renema lir,” ta pai metetdaktsü.
Taoba ita ishika tejaklen nungi tenzüka China’er stock shishilembabaren jenjang tekübokleni alutsü tenzük aka, par sorkari kasaji tajungba küma tanaben temalen ajungkettsütsü asoshi nungdakba maparen inyakba olen ka Li-i yashi lemsatepa liasü.
“Kechisarena ajunga nung Britain o China na tsüngda tesendaktep tajung lia külemi amalitepa inyaktsü jangrar,” ta Osborne-ia yashi metetdaktsü.
Par linük anati amalitepa inyaktsü mulungba den külemi, China sorkar den tangatettep nung par linük ana nung tongti shishilembatsü mapatong balala inyaktsü sentong atongba olen ka pai Li den lemsatep.
Ano külen, China Vice Premier, Ma Kai aser Osborne nati yashi amenba 7 buba China-UK Economic & Financial Dialogue senden külemi aniba osanga jangjaogo.