Beijing, June 01 (Agencies): Communist linük, China nung tang mezüng atema Laishiba otsü ka inoksemba ajanga ‘tamangba yimsü aser shisaliok na bendangba ozüng’ alema inyaker ta ashishia mangatettep adoka lir.
Linük yimtiba, Beijing nung secondary school tem nung item kaket amshiba ajanga senso kari tejashi nung, ibaji ajanga anüdoklen libaliro proker ta aitsüba sülen Mongolbarnü kaket yanglushirtemi, kaketshirtemi anüdoklen alirtem sobaliba otsü rajema alitsü atema iba otsüji inoksem, ta ashi.
Beijing Academy of Educational Science nung inyaker kati, “Katetshirtem shisatsü ulushitsü aser anüdoklen alirtem indang sobaliba otsütem rajema alitsü atema Laishiba kaket, Lipok nungi kar inoksem,” ta ashi.
Iba textbook nung China nunger sobaliba otsü aika inoksema lir aser iba kaketji 2006 küm adok aser first-year middle school kaketshirtem indang China oshi class tem nung agir, ta Daily osangkaket ajanga ashi.
BAES textbook centre director, Wang Kai-i, iba textbook ji Beijing nung secondary school shilem 40 shii agir, ta ashi.
Iba kaket ajanga online nung o toktepa sensotemi, “Kechiba secular linük ka nung Khristan otsü adoker(?)” ta asüngdanger.
Ocet zülur, Wang Xiaoshi-i, iba textbook ajanga China shisaliok ozüng alema inyakogo, koba ajanga linüki shisaliok aser tamangba yimsü na bendanger, ta ashi.
Communist Party of China timba ka Tsüngrem dak mamangertem lir tamangba yimsü benshitsü atema parnoki par züngsemtem nokdanger.
Ano kari, item textbooks ajanga bendangertem tali asanger aser China nunger tila kümtsür ta jembir, ta kasa osang ajanga ashi.
Ketdangsertemi ashiba agi, China oshi textbook temji sobaliba nung taliba rangloktsü atema akhangba nung ajemdaker yanglushi ta shiogo.
You must be logged in to post a comment Login