China Tir, Xi Jinping-i Vietnam semdanger

Hanoi, November 05 (Agencies): China Tir, Xi Jinping-i Vietnam linük tanü Brehostibar nü semdanga Vietnam lenirtem den ajurutepogo.

Yaküm, 2014 küm nungi tenzüka par linük ana tsüngda South China Sea den sentakba mangatettep ken o adokba sülen tesendaktep mejungi akümbaren tanaben tajungba küma yanglushitsü nükjidong nung Xi-i tan Vietnam semdanger lir.

Xi-i Vietnam semdangba maparen magizüker ta sayutsü nükjidong nung Vietnam nübur noklang ishikati Vietnam yimtiba, Ho Chi Minh City nung tanü longkak ait saka Vietnam sorkaribo anogo 2 agia Vietnam semdangsang, Xi ya tanü kanga pela agizükba osang jangjaogo.

Tenük kuli alirtemi ashiba agi, Vietnam sorkari tanü longkak aitertem nem mapang talangka longkak maidaktsüi parnok senshidaktsü aser longkak aiter nisung karbo gari nung anioka anir ao.

Vietnam-i par lushi ta züngokba South China Sea tzüyim nung China-i tongti totzü tutetdak ka yaküm tentetba sülen par linük ana tsüngda tesendaktep mejungi akümtsü tenzük.

Iba ken o ji adokba sülen Vietnam nübur aikati par linük nung China anema longkak aitsü sentong ayonga agiba den külemi, par linük nung alir China sensotem aika amokmerena azükba osang bushiteta lir.

Xi-i Vietnam nung yimsüsütsü tashi abenba Communist Party yimtenren telok lenisang aser Vietnam Tir, Truong Tan Sang aser Ato Kilonser, Nguyen Tan Dung na den tanü ajurutepa liasü.

Pai asüng, Hokolbar nüa Vietnamese National Assembly nung dena o jembitsü sentong renema lir.