China tsür temang tulutila operation agiogo

Beijing, November 16 (Agencies): China tsür temang tulutila, arishi küm 31 tain kati la operation agir temang ilaa akümba sülen la meimer angutsü imlar, ta osangbenertemi Hombarnü metetdaktsü.

Temang tuozük, kg 244, Lu Weishan-i temang nung temo aliba samadaktsütsü tapu aika merangdangba sülen, tan ita tetenzüklen Jilin province yimtiba Changchun city nung ‘gastric bypass surgery’ agiogo, ta China.org ajanga metetdaktsü.

Operation magidang lai, “Ni teti ayar amai dang liasü. Chiyuntsü achiba manenteti liasü,” ta ashi.

Lu ya lar medemtsür ka dang kg 15 agi taretba lir. La high school nung alidang yongi kg 95 taret liasü aser college atong tashi nung kg 149 aküm.

“Onok medemtsür aika temeimer ajurua kibong kümaogo, ajisüaka ni temeim tsütsü bilemtsü temulung mulutet,” ta lai ashi

Lu-i, “Ni exercise-a agidangogo, chiyungtsü machitsüa (dieting) merangdangogo, aser temang ila kümdaktsüba mozüa chidangogo ajisüaka kecha temelenshiba mangu,” ta ashi.

Lu-i iba operation indang taoba October nung mangashi tashi ki telung nung küm trok tashi atsüka liasü.

“Na tekaratiba nung tuozük ajema akümba operation agiba tajungba asütsü mesüra arishi küm 40 matongdang süadoktsü,” ta Lu’er doctor Jiang Tao-i la dang ashi.

“Gastric bypass operation ya US nung ajaki meteta aliba temang tuozük ajema kümdaktsütsü asoshi agiba surgery ka lir. Iba operation agiba sülen küm ka tsüngda nung Lu temang tuozük noklang nung shilem 60 nungi 70 tashi ajema akümtsü,” ta Jiang-i ashi.

“Tang la kanga junga lir. La yipten nung la sasa saka mener tzü aketba chiyungtsü chitetdar,” ta Jiang-i shisem.

La nem atakteta yutsüba chiyungtsü shidak lai achiba ajanga tarutsü nung la temang tuozük kanga ajema akümtsü, ta pai ashi.

China nung tang noklang nung shilem 46 tashi temang kanga mejungi chizüker alirtem lir, ta Chinese Academy of Social Sciences sangdong ajanga metetdaktsüogo.

April 2014 küm temulungjang tashidak agi asüsang, Sun Liang temang tuozük kg 300 liasü aser pa China nung ajak dang temang tulutisang liasü.