China:Küm 6,000 tejen Pentagon ki ka ngua lir

Beijing, November 28 (Agencies) : Alemli mapang aliba nüburtem aser parnok sobaliba bushisüngdangertem-i Shanxi province, China nung pentagon ki teraksa ka nguteta lir aser iba ki ya kin kar senden amenba mesüra lenirtem office asütsü. Iba ki ya küm 6,000 tejen asütsü, ta Hombarnü ketdangsertemi ashi.
Iba ki ya province nung aliba Taoyuan yimtak Neolithic ruins nung angu aser iba ki tasazükji square metre 90 lir. Iba ki indang jara cm 50 shi ang meraksa anünga lir, ta Shanxi provincial Institute of Archaeology nungi bushisüngdanger, Xue Xinming-i ashiba Xinhua news agency osang ajanga metetdaktsü.
Iba jaraji ayi o ali na meyoktepa yangluba lir aser ki sottsü atema tongshi aremba tapok aika liasü, ta Xue-i ashi.
Iba ki telung nung ali telunglen cylinder mesükba mimong ka angu aser iba amala mimong ya alemli nisungtemi tatsük angutsü, sorochioktsü aser tesangwa atema amshia liasü.
Xue-i ashiba agi, küm 6,000 tejakdang tang nguteta aliba ki mesükbatem kangabo maliasü kechiba süra iba mapa aliba nisüngtemi ki tulutibaji square metre 80 tashi angsa asü.
“Iba amala ki tulu ya kin lenirtem office mesüra lokti senden amenba aser kin tulu kar tekülem agiba ki ang ka asü asütsü akok,” ta ashidang pai Shanxi province nung iba amala ki ya tang mezüng angur, ta shisem.
China nung tesüiba mapangtem nunga pentagon yimya nung asüba ki 10 dak tema nguteta lir aser itemji Henan province kübok Lingbao yimti nung lir.
Taoyuan nung August ita nungi tenzüka highway yanglutsü atema ali atudang iba ki aliba meteta aru, ta highway yangluba mapa nung lenir, Zheng Yuan-i ashi.
Zheng-i, tang tashi nung ali square metre 2,500 ona lir aser iba mapang ki nguttetba tang masü saka mori chipu yangluba ki-a ka nguteta mori tapu balala indang tanüksa ngua lir, ta ashi.
Lai, tan ali atuba ya bushisüngdangertem atema kanga tongtibang lir. Iba tesem nung highway yangluba ajanga alemli China nung Shanxi, Shaanxi aser Henan province tem nung tashi taitiba mapang, Miaodigou Culture, jangja metetba nung yarir, ta ashi.