Chinese University-i Aamir Khan sentong ka thitsü

Luchii/December 19, 2018 (Agencies): Bollywood actor Aamir Khan, fan tem den ajuruteptsü sentong yanglur aliba sentong ka China nung university kati thitsüogo. Parnoki ashiba agi, iba sentong ayongertem campus amshitsü asoshi temelaba shidak magi. Khan tang China nung pa indang movie Thugs of Hindustan ajungkettsü asoshi oa lir.
Iba sentong ya Tentonü Guangdong University of Finance and Economics (GUFE), Guangzhou nung agitsü asoshi renemer liasü. Iba sentong ya pa indang movie ajungkettsü asoshi ayongba liasü koba taruba hopta China nung sayatsü asoshi renema lir.
Chinese media sangdong ajanga ashiba agi, school-i iba sentong akatsüba indang Tentonüang meteta aru. “Iba sentong akatsüba osang ya kaketshir kar tsüngda dang social media ajanga prokshia liasü. Kaketshirtemi iba sentong agitsüba mapang aser tesem indang jembiba mapang nungang school-i meteta aküm,” ta varsity nung inyaker kati ashiba Global Times ajanga sangdonga liasü.
Ajisüka Khan indang film tem ajungkttsüba Weibo account-i school-i iba sentong mebilemdangi thitsüogo, kechiyong kaketshirtem kanga yongyatepa liasü, ta sangdong. Iba post ajanga kaketshirtem aika mepelai kümdaktsü, parnoki ashiba agi, iba sentong agitsüba indang school-i Tentonüa meteta aru.
Kaketshirtemi ashiba agi, parnok iba sentong agitsüba tesem nung ghonda ka dak tali ataa liasü. “Iba ya sentong ayongertem tai lir, kechiyong parnoki school dang nungi campus telung nung ki amshitsü asoshi temelaba magi,” ta GUFE nung kaketshir Swim Xinzhu-i ashi.
“Iba amala sentong taoba mapang nunga kaogo aser sentong ayongertemi jelia osang agütsür lira kecha tetsükdaktsü madokla,” ta varsity nung inyaker kati ashi.
Sentong ayongba telok nung deputy manager-i ashiba agi, iba sentong akatsü asoshi tesendaktep mejungi akümba parnoki asadangdar.
Iba sülen fan tem den ajuruteptsüba sentong Four Seasons hotel-i belener ao koba Tentonü aonung 11:00 ako nung tema liasü.