Chinmayanand aitsüla LLM tatidang magütsüdaktsü

Shahjahanpur, Yimpoksüi/November 26 (Agencies): Taoba Union minister Chinmayanand-i la dak tashiyim benshi, ta aitsüla law kaketshir la ya Mongolbarnü attendance majungba ajanga LLM third-semester tatidang magütsüdaktsü, ta ketdangsertemi ashi
Arishi küm 23 tain kaketshir, shiba Hombarnü first-semester back paper tatidang agütsüogo, la Bareilly nung Mahatma Jyotiba Phule Rohilkhand University-i third-semester tatidang agütsütsü temelaba magütsü.
La attendance 75 per cent matong, ta ketdangseri ashi.
Law kaketshir, shiba Chinmayanand dang sen meshiba atema aija lir, la tang Shahjahanpur jail nung puoka lir.
La Mongolbarnü Bareilly-i tatidang agütsütsü asoshi security temi anir ao, ta jailor Rajesh Kumar Rai-i ashi.
MJP Rohilkhand University nung law department tekolakba Amit Singh-i, law kaketshir la ya third-semester tatidang agütsütsü aru saka attendance agi matongba ajanga la ket nung admit card maliasü, ta ashi.
Singh-isa, okadak ajanga attendance 75 per cent metongaka la tatidang agütsüdaktsütsü asoshi kecha tetuyuba agüja maliasü, ta ashi.
La ya Chinmayanand indang Swami Shukdevanand Law College nung zünga liasü aser Supreme Court-i tetuyuba agütsüba sülen la Bareilly college nung admission südaktsü.
Post-graduate kaketshir la yagi ashiba agi, arishi küm 72 tain BJP lenir yagi la dak küm ka tashi tashiyim benshi, ta aitsüogo.
Chinmayanand apuba sülen judicial custody-i yok aser IPC section 376C kübok aitsü, koba pei jenjang amshia tangar atsüa arua shi nung medemba dak sendaka lir, ajisüaka shi nung tashiyim agi medemba ama mezüngshir.
Iba taitsüba ya section 376 dang nungi tajemba lir, kong tashiyim benshirtem taküm tepeyong tashi tepuokdak ayutsü atema obendang agütsür. Section 376C kübok nisung ka küm pongu nungi ter tashi tepuokdak ayur.
Tetsürla aser par medemer asemi BJP lenir dang sen crore 5 meshiba atema puogo.