Chinmayanand ya party züngsem ka masü: BJP

Lucknow (Uttar Pradesh), September 25 (Agencies): Bodhbarnü BJP-i taoba mapang Union Minister, Swami Chinmayanand ya joko par party züngsem ka masü, ta metetdaktsü.
Law student tetsür ka tashiyim amshia raksatsüba ken o nung police-i Chinmayanand pua lir.
Osangbener den jembidang BJP otongdar, Harishchandra Srivastava-i, “Pa ya BJP züngsem ka masü,” ta ashi.
Ajisüaka Harishchandra-i Chinmayanand ya kodang nungi BJP züngsem ka masüar, ibajibo memetetdaktsü.
“Tangbo onok indang records ajak digitised süogo, anungji pa kodang nungi ozü party züngsem ka masüar ni meshitettsü,” ta pai ashi.
1999 küm 13buba Lok Sabha election nung Chinmayanand-i BJP candidate ka ama Uttar Pradesh kübok Jaunpur menden nungi toktepa takok ngua liasü aser Atal Bihari Vajpayee-i aniba BJP sorkar nung Minister of state for home shima liasü.
Tetsür tashiyim amshia raksatsüba ken o temai adokba sülen BJP lenir shingaia pa pusema mejembi. Taoba Hokolbar nungi tenzüka pa judicial ket nung lir.
Tamalena Chinmayanand sülen anidaker kati Chinmayanand-i tashiyim amshia raksatsü aser puer otsü merang ta ken o benoka liasü ajisüaka yaküm Uttar Pradesh Chief Minister, Yogi Adityanath-i Chinmayanand anema benokba ken otemji agientsü tuyua liasü.
2011 küm November 30 nü Mumukshu Ashram Manager-i, Chinmayanand-i küm aika la pua ayu, tashiyim amshia raksatsü aser azük ta tai tonglokja pa anema ken o benoka liasü.