Chirang nung Jihadi training agirtem apu

Guwahati, September 18 (Agencies): Bodhbar aonung Chirang police-i Jihadi training agidak ka makogo aser training agir nisung asem puogo.
Training agir züngsem asemji Minarul Islam, Johrul Haque aser Badiur Zamal Sheikh nunger lir ta jangjaogo. Tang tashi nungbo police-i parnok adenba telokji memetetdaktsüi lir, ajisüaka parnokji Muslim nunger tali bilemloka aor telok ka nungi lir ta shiogo.
Bushisüngdangba ajanga par asemji September 7, 2015 nü nungi Dhaligaon, Daukhanagar nung aliba training camp nung adenertem rongnung densema lir, ta bushitetogo.
Iba dak sentakba nung senior police ketdangser kati, “Barpeta, Bongaigaon, Baksa, Nalbari aser Kokrajhar nungi tajemba agi nisung teku nisung ka tenüng agir Iman Ali’er kidang traning agia liasü. Item nisungtem atema par kidang takdang ka sülokja liasü. Onoki raraba oset kecha menguaka camouflage (sepai/telungpur süoshi) korang aser yangkhu puogo,” ta ashi.
Police-i ashiba agi, item nisungtem nemji telok nung adentsü atema lower Assam district tem nungi züngsemten anidentsü mapa lemzükja liasü. Parnoki police dang, Muslim nüburtem kümzüka ayutsü atema parnoki telok ka tentetnüa liasü, ta shiogo.
Osang ka ajanga ashiba agi, Barpeta district, Howly tesem nungi nisung ka tenüng agi Ashique (Burabhai) aser Mofiz nati iba training agidakji tentet. “State nung iba dak alia traing agiba tesem aika alitsü ta onoki bilemer. Onoki mita aoba maparen tenzükogo,” ta kasa osang ajanga ashi.
Tang nisung asem apubaji ajanga district aika nung police tem asentenshidaktsüogo.
Tawa West Bengal nung Burdwan bomb lendong nung Jamat-ul-Mujahideen Bangladesh (JMB) züngsem Sahanur Alom aser pa kinüngtsü na densema aliba ajanga state nung Jihadi telok aliba kuli tejangja nguogo.