Chirang nung police aser lungkak aiter raradang nisung 70 shi yiru

Guwahati, October 27 (Agencies): All Bodoland Territorial Council Minority Students’ Union (ABMSU) züngsemtemi train nokdanger lungkak aitba sentong ka agidang sepai 20 shi ka den lungkak aiter 50 dak tema yiru.
Brihostibarnü ABMSU züngsemtemi Salakati railway station nokdanger lungkak ait asr iba mapang police den mepetmesü adoka raradang nisungtemji yiruba liasü.
Taküm August 1 nü Kokrajhar nung aliba Titaguri market nung parnok lennir Lafiqul Islam tepsetba ken o atema temeden agüjang ta takhangba agüja ABMSU-i lungkak aityonga arur.
Tanü lungkak aitertem jagi lung agi ona raraba agi police-i süng agi parnok dak züka senshidaktsütsüsa aküm, ta police-i ashi.
“Police-i lungkak aitertemji railway station-i meyoktsü atema nokdangtsü merang, saka parnoki tenokdangbatem ajak raksatsü aser police dak lung agi aontsü tenzük. Iba jagi police-i parnok dak süng agi züka senshidaktsütsü merang aser tear gas shells kar khadok” ta Kokrajhar SP Rajen Singh-i osangbener dang ashi.
“Lungkak aiter 46 shi ka pua lir. Lung agi aonertem maitsü jangjatsü atema media nungi bendenba video footage reprangdangdar” ta paisa ashi.
Ajisüaka, ABMSU-i parnok dak tai tongloktsüba onüktemji magizüker.
Centre-i iba ken o bushisüngdangtsü atema CBI ket nung agütsüogo anungji nenoki kechiba lungkak aiter ta asüngdangdang ABMSU general Shahkamal Khandakar-i “Lafiqul atema temeden meshia ita ka tejaklen nungi lungkak aitba tenzüker agiyonga arur aser iba nung train lenmang mokdangbaji shilem ka liasü” ta langzü.
“ABMSU-i October 30, 2017 nü lumia lungkak aitba sentng tenzüktsü” ta paisa shisem.
Train lenmang mokdangtsübaji ABMSU-i railway ketdangsertem dang shishir liasü saka tanü ozü züngsemtem Salakati railway station matongdang police-i parnok nokdang, ta Khandakar-isa shisem.
Iba lendong nung tetsür züngsem aika aser parnok rongnung Lafiqul’er kinungertem dena yiruogo, ta paisa ashi.