” Chirnur Tsüngrem metetba nung anitetba Tetsü-ka “

~ L.Kika Pongener Aoyimkum,Dimapur.

Lai  –  Anitet-2:1- 6.  Tang nisung ka Levi kidong nungi ao aser Levi jala ka kibutsü asütsü agi. Tetsürji mashisa aküm aser jabaso ka aso,aser lai pa jabaso tajung ka ta ngua lai pa ita asem miima ayu. Aser kodang lai pa miimbangtsü makok ta ajitet,lai Tzütok Molok ka bena arua temenatepba sungtsü agi nübang; aser lai tanurji idakji ajungoker Nile ayong rangbangnü ka nung yutsü. Aser pa kechi kümdir ta teyi Miriam apiga nung nokdaka ali.Aser Farao jala Tzü chigotsü alu,aser lar aiür chanutem ayong anasaji senzü, aser Farao jalai ayong nung rangbangnü nungji molokji angu,aser aji bener arutsü lar kilitsür yok. Aser lai molokji lapok aser tanur Mosaji angu.Aser ajiang tanur jagi ajep aser tanurji apayua reprang aser ashi ibai Ibri chir rongnung ka lir.
Israel nunger küm noklang pezü dak chia Ijip nunger Farao chuba küpok alar tia nung aliba putu tensa ka nung tang zülua aliba Laishiba tekong nung shia aliba otsü ya atalok.Ajioda, Farao chuba-i Ibri nunger küm asem teküpbok tebur chanu ajak tepseta indoktsü asoshi ozüng tesashi ka agütsür aliba mapang ka nung, Mosa tetsü-i temulong ulua lar jabaso Mosa ita asem tashi miima ayu. Aser joko lai pa miima ayutsü mekoki aküm nung Tzütok molok ka renemer Farao jala tzü chigoi aruba tesem Nile ayong nung oa toktsü.
Iba otsü nungi asenoki angazüktsü Tanela lesson kar :
Mosa Tetsü-i Ijip chuba ozüng tesashi nungi lar jabaso sor ita asem tashi miima ayu, aser iba jagi Mosa metepsetdaktsüi taküm kümzük. Ajioda chirnur asoshi khuret abenba aser  Tsüngrem tsübuba tetsü kati pei chirnur alima temenen tesashi tatidang balala nungi la  miim tamang agi wazüka kümzüka ayur.
Mosa joko ita asem dak tali miima ayutsü makok ta metet nung lai Tzütok molok  tebor tajung ka renem aser tatentep (Joint) ajak temenatsü süngtzü agi menabang,kechiaser molok  telungi tzü senoka aitra molokji tzü telungi aitsü aser tanurji araksettsü. Yamaji lai lar jabaso kümzüktsü asoshi Tamang molok (Shelter) ka  renem aser anogo shia temenen temesüzükba tatidang kecha agia mekokdaktsütsü  asoshi  kipok tekülem nung maneni  Tsüngrem O ajang- ajanga sayu.
Aser tanurji metepsetdaktsüi kümzüktsü mechi lai Farao jala teti tzü chigodak tesem Nile ayong nung oa toktsü. Ashiko lai Farao jalaji koba anogo nung Tzü chigoi arur, koba mapang nung arur,koba tesem nung chigor item ajungaji kanga junga asüngdangyar dang yutsür alitsü sudi.Yamaji masü nungbo indangindanga majuruteptsü aser samatsü. Yamaji Tsüngrem tsübuba Tetsü kati lar chirnur mesamai kümzüka anitettsü asoshi tanur ka pa aotsüba lenmang shidak nung toktsür aser aniteter. (Tanur ka pa aotsüba lenmang shidak nungji sayutetang. ~ Api.Shi-22:6)
Mosa tetsüi lar jabaso kümzüktsüba tesem shidak nung toktsüba ajanga mesamai kümzükba dang masü, saka lai aginuba ama nükjidong shidak ataloka Farao jala ket tongdaktsü. Aser lai la jala Miriam kechi kümdir ta repranga ojita nung nokdaka toktsü.
Tetezü Tsüngrem tsübuba Tetsü kati lar chirnur School, College,office mesüra mapa balala-i aodang teti nemeta sarasademer sayutsüngi o tajung shir yoker aser ajioda pa/la sülen Mosa teyi Miriam ojita nungi repranga atadaktsüba ama Tsüngrem tsübuba Tetsü ka tamang sarasadem aser sayutsüngi o teti lar chirnur sulen anitaker.Iba jagi temenen menatsüsa tatitang balala ajurudang  item nungi kümzüker.
Aser Mosa tetsüi tzütok molokji  mashimashi ka yanglu masü ashiko tebor kanga junga yanglur alitsü,iba jagi tang Farao jala puadaktsü aser apiga nungi iba molokji angudang apayuseta reprang. Anungji iba molokji  bener arung ta kilitsürtem dang ashi. Yamaji Tsüngrem tsübuba tetsü kati lar chirnur tanela nung tang masü,saka temang shi (Physical)nunga anema junga alitsü aser topur junga merukmejua indaktsütsü asoshi lai bendanga agüja nendaka anepalur. Yamaji  Yisu tetsü Mary-ia Yisu shisatsü nung, temang shi nung aser tanela ajunga nung sütepsütepa anitet.
Luke-2:52.  Aser Yisu shisatsü nung,temang shi nung aser Tsüngrem aser nisung matsüngdang sütepsütepa taochi nung ain.
Anitet-1:19.   Nuso yarirtemi (Nurse) Farao Chuba dang ashi-Ibritsürbo Ijiptsür ama masü, kechiyong parnok jeretperar, aser nuso  yarirtem  parnok dangi marudang parnok sasa benteter alir.
Temeim ojalatem, Ijiptsür nuso yarir (Nurse) tem-i Ibritsür nem naroküm Nungjalok tajung agütsüba amaji, Tetsütem ajak nem agütsütettsüsa tanü Mothers’ Day nungtem nung tetsütem ajak ayongzüker. Tsüngremi ojalatem ajunga arishi talang moajangma..