Chiyongtsü

Yisui parnok dang ashi, “Shibai ni yok Pai mulungba inyaktsü aser renemtsü kü chiyongtsü lir.” Yohan 4:34.
Yisu tenzükba mapang tepiyong nung asenoki Pa mezüngbuba mapa aser nütsüngtem bilemba nung tepila angur. Nütsüngtemi teti parnok temang nüngdak koda angutsü aji bilem (Matt 14:15-17, Yohan 4:8; Luke 18:28). Yisui parnok Tebui parnok nüngdak metet ta lepshia ashi aser moatsütsü ta ashi (Luke 11:11-13). Yisui parnoki mezüngbuba bilemtsübaji “Tsüngrem yimli aser Pa temeshiba bushitsüla”. Iba jagi dang taküm nüngdaktemji moatsütsü (Matt. 6:33).
Tzübo nung Yisui tetsür den jembidang nütsüngtembo anasa aliba yimi chiyongtsü bushi oadoker liasü. Yisui iba tetsür nem taküm tzü agütsü iba jagi la teti asoshi temulung süa alitsü. Kodang nütsüngtem meyipa aru parnoki Pa dang chiyongtsü ashi. Pai parnok dang langzüa ashi Pa chiyongtsüji Tebui mulungba inyaktsübaji lir ta ashi. Parnoki alima asoshi bilem nung parnoki Yisu telangzübaji mangatet. Yisu takümji Tebui mulungba tashi angaba nungi aru. Iba anogo Yisu tashi angaba ajanga tetsürlaji teti taküm angu. La tejangraba ajanga aika lia parnoksasa Yisu dang angatsü asoshi Yisu dangi anir aru, aser aikati amang. Parnoki atangji Yisuji Khrista aser alima Kümtetdakba ta agizük (Yn. 4:39-42). Yisui nütsüngtem dang kechi sayua liasü tenyar Pauli angateta liasü. Pauli Rom nung tamangertem dang Tsüngrem yimliji tajitsü aser tajemtsü masü saka Tanela Temeshi nung temeshiba aser yimjung aser tepela kechiaser shibai item nung Khrista tenzüker Tsüngrem tsüngdang tagizüktettsü aser nisung madanga tajung lir (Rom 14:17-18).
Kodang Satani Yisu dang lung agi am kümdaktsütsü asüngdang, Yisui Laishiba nungi langzü, Pa taküm aser tenzükba tejangja ashi: “Nisungi am tesa agi taküm malir, saka Tsüngrem bang nungi adokba O shia agi taküm alir.” (Tazüng. 8:3).