Chiyongtsüba ozüng

Linük nung kiset shiruru bener arua ayokdak shingaia shi achitsü atema mayoktsü aser malitsü ozüng azüngba ya shi ayoker aser shi achirtem anema mebilemdangi inyakba mapa ka lir. Item shirurutem rongnung nashi, jang, sü aser ut nungertem dena lir. Tetezü, alu alaba mesüra nisungtem nüngdak nung amshitsü atema ayoktsü aser alitsüba dak alaka shi achitsü atemabo item shirurutemji ayoktsü aser alitsü memelar. Atangji, India nung shi machiba yimsü amangertem teimba lir. Takoktsü ka dang süra shi machibaji temang asoshi junger, ajisüaka alima nung kin teimbakati shi achir asünungji shi machitsü ajungshitsüba dak alaka shi machitsü ozüng agütsütsübajibo shisataka mapa ka masütsü. Tang India nung center government-i nashi aser jang melepsettsü ozüng agütsüba ya shitakba agibo shiruru metepsettsüba ozüng kübok masü saka shiruru meima aser apayua amshitsüba ozüng ” Prevention of Cruelty to Animals Act, 1960 (PCA)” kübok agüja lir. Iba ozüng yabo shi achirtemi balaka shiruru dang kanga maochii benshir, iba jagi tepseta achitsü asüyonga shiruru dang kanga meima benshitsü asoshi latettsüba ozüng ka lir. Atangji, shiruru dang meima benshitsüba yabo India nung government-i ozüng küma melatetdangyongi asenok Naga nunger aser Aor sobaliba nung benshia aru. Aji oda, kasa tachitsü atema tepseter asüyonga shiruru taküm talangka mesüdaktsüi kangshidaktsüra asenoka taküm nung timtem tekangshi ajurur aser shiruru metsüba nung azükaru masür ta amanga arur. Ibayongji, nashi aser jangjibo yutsür an rangset dang dena talangka mekangshii yakta südaktsür. Ajisüaka, iba jagi shi achitsü atema shiruru metepsettsü ta masü saka parnoka taküm asünungji parnok dang meima aser aochia benshitsübaji asenok sobaliba akümer. Ajisüaka, tang Center nung BJP government-i shingaia shiruru tepsettsü asoshibo tayoka mayoktsü aser talia malitsü ta ozüng latetbajibo linük nung külem sensosangertem shirnoki nashi shi aser jangshi achir parnok asoshi junga mebilemdangi renemba maka ka asütsü. India ama temeyoktep kin aser nübortem alidak iba ama langkotem ozüng ya mapa küma meinyaktettsü. Atangji, shi indang jembir asünungji asenoki shi achirtem asoshi dang bilemer, ajisüaka nashi metsürtem, shi alepertem, hotel amenertem aser shi agi chiyongtsü tapu balala yanglua ayokertem million aika mapa makai akümtsü. Ibaji linük nung yimten asoshi tebilemtsü tuluka asütsü. Aji oda, democratic aser secular lima ka nung sensosangertemi achiba aon tashi nung ozüng zünga yutsütsübaji government-i menüngdakba mapa ka kanga süokia ia inyaker asütsü. Iba jagi tebilemtsü masütsüba mapatem agi meimlaba tebilemtsü tuluka küma linük nung timtem aser rongrong adoktsü ana nung dang lir. Atangji, ibai chiyongtsü dak aketba ken o lir aser linük nung senso purtem asoshi government-i kechi aon achitsüla aser kechi aonbo machitsüla, itemji lateta yutsütsübaji tim masü. Ibajibo state government asoshia tim mapa ka masütsü. Shi achitsü machitsübajibo senso ka mulung südaktsütsüla. Chinüra alima nung anguba shiruru shi ajak achitsüa akok. Ajisüaka, senso ka nem tangatetba agütsütsübaji tangu aser techinü asaa masü saka shiruru taküm apayua aser meima inyaktsüla. Ibaji dang masü saka asenok temeyoktep lokti nung alir asünungji asen den külem alirtem shirnoki asenok achiba chiyongtsü machir, parnok akümtsübua asenoki awazütsüla. Shi achir asüyonga, Hindu nunger tsüngdang kecha hau ta mali nashishi amshia sayubajia masü mesüra Muslim nunger tsüngdang ak shi amshia sayubajia masü, saka alima nung asen kija alir masü aser melitettsü asünungji, mapa inyakyim aser sobaliba ajak nung tangar sobaliba aser tangar yimsüa akümtsübua benshitsübaji asenok senso shia teinyaktsü mapa asütsüla. Iba tangatetba nung Nagaland government-ia center government dang tang Nagaland nungbo nashi aser jang malep anentsüba ozüngji mebenshitettsü ta shiadoktsüla. Iba ozüng ya Assam kisüng nung mapa küma amshitet nunga süng, kenpiga lirbo Nagaland nung nashi shi aser jang shi seret nung sen meyirijang tema agiang angutsü !