Chiyungba yimya shingaia melenshitsütsü makok: Kerala CM

Kannur/Alappuzha (Kerala) May 28 (Agencies): Deobarnü Kerala sorkari, Centre-i nashi tepsettsü nokdangba anema state sorkari ozüng ka benoktsü, ta metetdaktsü.
Tanü Alapuzha nung sentong ka nung jembidang Kerala Chief Minister, Pinarayi Vijayan-i, “Kerala nungeri sobaliba chiyungtsütem chia arur, aser itemji temang den tapet, aser ibaji shingaia melenshitsütsü makok,” ta ashi.
“Nüburtemi pei chinüba chiyungtsü achitsü atema state sorkari nüngdakba ajak inyaktsü. Kerala nungeri chiyungtsü achitsü atema New Delhi nung mesüra Nagpur (RSS headquarters alidak) nungi shinga danga angazüktsü menüngdak,” ta Vijayan-i ashi.
Yashi Centre sorkar telemtetba anema Vijayan-i Ato kilonser, Narendra Modi dangi shidi ka zülua liasü, aser tanü pai iba atema BJP-i aniba Centre sorkar aser RSS aitsüogo.
Local Administration Minister, K T Jaleel-i, Centre sorkar telemtetba agiena, state sorkari ozüng tasen ka benoktsü, ta metetdaktsü.
Ano külen state nung opposition Congress-i aniba UDF-i Centre telemtetba anema asüng ‘black day’ amungtsü lemtetogo.
Iba onük nung o toktepba mapang ka nung tanü police-i Youth Congress nung inyaker, Rijil Makulti den kari Kannur nung ‘Beef fest’ alidang yimjak nung nashi ka tepsetba atema parnok anema ken o benokogo.
Centre telemtetba anema yashi Congress aser Left party-i state tesem ajaklen ‘Beef fest’ ya ayongzüka liasü.
“Yuva Morcha-i benokba nung ajemdaker Kerala Police Act kübok Section 120 A nung ajemdaker ken o ka benokogo,” ta Kannur SP, Siva Vikram-i osangbener dang ashi.
Iba section kübok, lokti nung nisung kar jashidaktsütsüsa yimjak nung shiruru tepsetba atema küm ka tashi tepoukdak ayutsü mesüra senchi 5,000 achitsü, mesüra temerenshi anaprong agütsütsü lateta lir.
Yashi tatalokba anema Mongolbarnü Kerala nung NDA-i longkak aittsü lemtetogo.
Iba tatalokba dak sendakba nung Congress-i, ozüng alema aibelener shinga pu-masemtsü, ta shiogo, ajisüaka Youth Congress züngsem, Rijil-ibo, pai inyakba mapa atema pai kecha mesasar, ta ashi.