Chiyungtsü Achitsü Arendaker

Meimchir taküm anema alitsü atema exercise agiba den chiyungtsü tajung achitsüji kanga tongtibang, ajisüaka tanü putu nung asenokbo bazaar nung ayokba süngolemba, süngjanglijang aser ango nunga mozü chisemba ajanga asen temang nung mejangjaba timtem aika ajangshia alitsü südi ta bilemer. Taküm küm tetenzüklen Dimapur nung shishilembadak süngjanglijang ayokertemi süngjang tapu balala tekaraba nung mendaktsütsü atema ‘calcium carbide’ mozü amshiba putet. Iba sülen taoba ita osangkaket nung sorkar ketdangser kati Mokokchung nungi Dimapur tashi ainlen senzüdang Naga nunger kari Khatkatti (Bokajan area) nung ak shi stall ka nungi ak shia alia asoba nung chemical (formalin südi ta bilem) kanga menemba sülen nüburtem dang tekümdangtsü osang ka lemsatep, aser tang tesüsa Kohima nung ayoktsü atema bener aruba ango nung formalin keta aliba asenoki osangkaket ajanga jangjaogo. Shibai metet tsükla mapang asünungji asen lima ayokba shi nunga karibo formalin amshia alitsü südi. Tawa Nagaland aser Kerala na nung ango nung ‘formalin’ mozü amshiba ajanga India kübok ango sapua achiba state tem atema anema-alibaren tsütsü ano tebilemtsü tasen ka adokogo. ‘Formalin’ ya chemical agent ka lir aser iba ya tasümang ayudak tasümang shizüka maotsü aser laboratories nung shiruru aser tasümang mapang talangka shizüka maotsü atema amshir. Süngjanglijang, süngolemba, shi aser ango ajak nung item ama mozüji amshira asenok achitsü kecha manünger. Asen lima nunga shi, ango aser süngjanglijang nung formalin ya amshidar ta mapang talangka nungi melung melemi liasü. Kanga menor süaka shir shisa tajung ajanga apiteta ango nung formalin ali-mali tendangogo, nüburtemi parnok dang pelatsüla. Kerala nungbo ango merüka amshitsü aser mozü mamshidaktsütsü nükjidong nung yaküm Tsüklai/February ita nung ‘Operation Sagar Rani’ tenzüka liasü, aser iba mapang nungjagi tenzüka tang tashi nung formalin aketba ango seret 21,600 shi puogo. Formalin nüngja ya formaldehyde nungi jatet, aser iba mozü nung carcinogen aliba ajanga meimchir dak kongshir; carcinogen ya cancer tashidak adokdaktsüba agent ka lir. Kerala nungbo kibong aika nung anogoshia ango achir, ibayongji state ketdangsertemi ango nung formalin junga mita repranger. Yamaji asenok Naga nungera anogoshia ango achirtem mesüaka aikati hopta nung khen-anabenbosa achir, anungji tang nungi danga tim ketdangsertemi junga mita reprangtsüla. Ano Kerala nungbo nisüngtemi peisasa ango nung formaldehyde aser ammonia ali-mali tendangtsü atema Kochi’s Central Institute of Fisheries Technology (CIFT)-i ‘kits’ ka adokogo. Iba kit nungji paper strips, reagent solution aser standard chart 25 lir. Koma tendangtsü- iba kit nung aliba paper strip kati angoji khen aishitsü, iba sülen solution mozü tzüjang ka paper nungji jenloktsür minute ana tsüngda sentsüh melen-memelen repranga atatsü; paper ji nakrema anüng sentsü küma melenra ango nungi mozü amshia lir. Kobi melii iba kit ji asen lima tongra koda ajungtsü. Asen lima nung asenok peritsüsa asenoki süngolemba aser süngjanglijang mezüsenteter, iba denji külemi asenok peritsüsa shi-ango memetsühteter, anungji chiyungtsü timbaka tangalen nungi bener arubasa achitsüsa akumtsü, ajisüaka joko tang nungi danga tim ketdangsertemi mapang shia chiyungtsü tapu balala nung mozü amshiba mita reprangtsüla, aser chiyungtsü nung mozü amshia meimchir temang raksaja aibelenba nungbo kecha atsüa-anem makai lateta aliba ozüng nung ajemdaker senchi chia tepoukdak ayutsüla.