Chiyungtsü mebangnangba aser aonung junga mejanga maoba anepaluyim

Chiyungtsü chinü-yongnüa maitba tashitak dangji Anorexia ta ajar. Iba tashitak agi kangshirtem jagi chiyungtsü mechinütsü aser aonunga junga mejanga mao kangshitsü. Item timtem ajanga parnok temang tekongraba dang küma aotsü.
Chiyongtsü tatakzük shitak (diet) machiba aser asentzü sendoka mapa meinyakba ajanga iba timtem ya adoker.
Anorexia tashitak anepalutsü atema Naring (Orange) aser tsükmenatsü (grapes) süngjangtem ya chiyungtsü tajung lir. Item süngjang ajanga tepin nung chiyungtsü menüngsangba tzü sadema aludaktsür.
Anorexia anepalutsü asoshi ano Apple-a kanga junger. Iba süngjang achiba ajanga tepin nung chiyungtsü digest asütsü ‘pepsin’ ta ajaba tzü ka renlokdaktsür. Iba tzü ajanga tepin nung chiyungtsütem mela mela menüngsateter.
Ano anorexia atema aonsotsü tajung kaji, lasüng (garlic) ya lir. Lasüng ya tzü nung molur soup ama ajemba ajanga iba tashitak agi kangshir nem teyari agütsür.
Tzü marok ka nung lasüng ana-semka metazüker, tasen tzü den meyokteper ajem nung kanga junger.
Digestive system merüktetba den chiyungtsü tasazük shitak (diet) achiba ajanga dang Anorexia tashitak ya anepalutettsü.
Anogo 20 nü pei sasa Anorexia tashitak anepalutsü asoshi teinyaktsü kar yamai tsünglanglen agütsür:
Tetenzük anogo asem nungi pungo tashi, naring tzü aser tzü dang jema lumitsüla.
Anogoshia, anepdang 8 ako nungi aonung 8 ako tashi, ghonda ana shia tzü talem nung naring tzü enoker ajemtsüla.
Iba tzü ajemba mapang, tanga chiyongtsü kecha machitsüla, aji mesüra lumibaji kecha tajangzük malitsü.
Ne temang den orange juice meputepra, tzü mesüra carrot tzü ajem nunga ajungtsü.
Iba lumiba sülen, anogo pungo nü atema süngjanglijang dang ajitsüla. Apple, pears (naspati), grapes, grape-fruit, naring, chiro, peach (mokori) aser mapu züngi nunger achitsüla.
Iba sülen, anogo 10 nü atema mela mela tepin nung menüngsaba chiyungtsü-tem achitsüla. Aonsotsü süngolemba amala, tzü aketba süngjang aser buttermilk chiyungtsütem achi nung kanga ajungtsü.
Iba inyakyim ya shitak anidaktet nungbo, ne tepin nung aliba mim-ji endoktettsü aser na chinü-yongnüa akümtsü.
(Source – Internet)