Chiyungtsü peria mechidaktsüba tanurtem timba India nung lir

Mangaluru, November 01 (Agencies): Tesüiba küm 10 nung India nung tanurtem asüba mesüra arishi küm 5 ser tekübok tanurtem asüba kanga ajema kümogo, ajisüaka alima nung chiyungtsü peria mechidaktsüba tanur shilem 50 bo India nung lir, ta ASSOCHAM aser EY-i study ka ajanga bushitet.
‘Bridging the gap: Tapping the agriculture potential for optimum nutrition’ ta ajaba study ajanga, 2015 küm tatemlen tashi nung India nung tanur shilem 40 bo chiyungtsü peria mechidaktsüba tanurtem liasü, ta ashi.
India nung arishi küm 5 ser tekübok tanur shilem 37 temang touzük kanga ajemer, shilem 39 chiyungtsü agi matu aser dar tatsü, aser shilem 21 bo chiyungtsü agi kanga matu.
Arishi küm 5 ser tekübok tanurtem temang touzük ajema alibaji yimtsüngtem nungi shilem 38 aser jila/yimtitem nung shilem 29 lir, ta parnoki ashi.
Kasa study ajangasa, tanur arishi ita 6 nungi ita 23 tsüngdapur shilem 10 shi dang chiyungtsü peria chidaktsür, ta bushitet.
India nung arishi küm 1-5 tsüngda tanurtem aso-ajen mesütepba shilem timbaji Uttar Pradesh nung shilem 50.4 lir, iba sülen Bihar shilem 49.4 aser Jharkhand shilem 47.4 lir. Tanüngba state tem nung- Chattisgarh nung shilem 43, Meghalya 42.9, Gujarat 41.6, Madhya Pradesh 41.5, Assam 40.6, Odisha 38.2, Haryana 36.5, Rajasthan 36.4, Maharashtra 35.4, AP 35.4, West Bengal 34.7, Karnataka 34.2, Himachal Pradesh 34.2, Uttarakhand 34, Manipur 33.2, J&K 31.7, Tirpura 31, Punjab 30.5, Delhi 29.1, Nagaland 29.1, Arunachal Pradesh 28.4, Sikkim 28, Mizoram 26.9, Tamil Nadu 23.3, Goa 21.3 aser Kerala nung shilem 19.4 lir.