Choir Mastertem asoshi Impur nung Music training agi

Mkg, Tsüklai/Feb. 7, 2020 (TYO) : Ao Arogotem nung Choir Mastertem asoshi music training ka Mokokchung Town B/A, Kohima Ao B/A aser Dimapur Ao B/A ajanga Impur nung February 5-7, 2020 tashi agüja liasü. Tanü arogotem asoshi ibaya rongdak nungdak ta angateta rongsen jenti entokaka arogotem nung nubortem ajaki lirumedema ken atenba ajanga Tsüngrem sentsüwangshidaktsütsü nukla nung iba training agia liasü.
Rev. Dr. Mar Atsongchanger Executive Secretary, ABAM ajanga tayongzükba agütsüba mapang Mr. Noksenger (Garo) kibongi Yisu dak amangba ajanga par kibong rangben tepsetba mapang Noksengi ashiba O ” Ni lemtetogo Yisu den aotsü, kü den shinga maruyonga nibo odang anidaktsü aser kangki kü jakdang aser alima kü sulen liaka nibo odang anidaktsü ni lepa maotsü” koba tasütait o ajanga yimtsüng nung tekolakbai anir yimer ajak Yisu sulen anidaktsü lemtet, iba o nungi Indian Missionary Sadhu Sundar Singh aser American hymn editor William Jensen Reynold ajanga ken yanglu aser tanü iba ken ajanga ajak dak kongshir yamaji aseni yangluba aser atenba ajanga nubor mulung nung kongshitsüsa sarasadema inyaktsü nungdak ta ayongzüka liasü. Paisa training nung atener ajak dang tia ajak nung kechi sudir suang “Ni lemtetogo Yisu den aotsü” ta asüba tamang nung asenoki lidi ta tayongzükba tulu agütsü.
Mr. Yanglu Pongen MTBA, Mr. Pangerlemba MTBA, Mr. Talimeren DABA, Ms. Amongbi Jamir KABA aser Mr. Moanok Tzüdir KABA ajanga basic aser advance telok anaji lemsaer sayua tarurtem tangazükba jenti lia agiogo. Ajak agi arogo 47 nungi Music Director aser Choir Mastertemi anir nisung 96 arua iba training nung aten.
Maneni arogotem ken tenba mapa nung temulung agüja inyakdang Tsüngremi pa sentsüwangshi asoshi amangbapur ajak yariangma aser MTBA, DABA aser KABA dang pelaba den maneni Tsüngremer wadang asoshi maneni nenok amshiangma ta ABAM sarasadem ayur ta ABAM sangdong ka ajanga metetdaktsü.