Chong Wei-i Chen Long koka China Open benogo

Petaling Jaya, November 15 (Agencies): Malaysia nuner Lee Chong Wei-i Deobarnü China Open final nung tebur kija asayaba tarensen nung mezüngbuba jenjang nung tan mezüng takok nguogo.
Tesüiba mapang world no 1, Chong Wei-i China Open filnal asaya Fuzhou nung asaya dang China nunger Chen Long madak minute 50 nung 21-15, 21-11 agi takok angu.
Badminton kija asayaba tarensen nung Wong Choong Hann-i 2002 küm, Chong Wei kinungtsü, Wong Mew Choo-i 2007 küm aser tan Chong Wei-i takok anguba zünga China nung Malaysia nungeri asemben buba takok angur asütsü.
Tang tashi nung badminton nisung anana asayaba tarensen nung Malaysia nungeri China nung takok angurji 1989 küm Razif aser Jalani Sidek na ang lir.
Ita ishika junga masayateti aruba sülen tangbo Chong Wei-i kanga junga asayateter. Taruba küm Rio nung Olympic Games asayatsü anasa iba takok ajanga pa tasü itshitsü.
Anogo ka tejakdang Chong Wei-i ponguben tashi world champion bena alisang, China nunger, Lin Dan semi-final nung koka liasü. Küm pezü tsüngda nungi pai tan mezüng Lin Dan akokerba lir.
Ano Haixia Olympic Sports Center nung tetsür kija asayaba tarensen final asaya nung Olympic champion, Li Xuerui-i minute 39 tsüngda nung India tsür Saina Nehwal madak 21-12, 21-15 agi takok angu.
Li Xuerui-i 2012 aser 2013 kümtema kasa asayamung nung takok ngua liasü.