Chong Wei madak takok ngua küm tasen tenzükba pelar: Srikanth

Mumbai, January 03 (Agencies): Deobarnü Lee Chong Wei madak takok anguba sülen India nunger badminton asayar Kidambi Srikanth-i, Malaysia nunger Wei madak takok ngua küm tasen tenzükba ya ni asoshi tepela balaka lir aser tang tasayadak aliba Premier Badminton League (PBL) nung junga asayatsü merangtsü, ta ashi.
World No.9 Srikanth ya tan PBL nung Bengaluru Top Guns telok nungi asayar aser pai Hyderabad Hunters nungi asayar, taoba mapang World No.1 Chong Wei madak 15-12, 6-15, 15-7 agi National Sports Club Of India (NSCI) nung takok ngua tebur kija asaya nung mezüng jenjang nung takok angu.
“Küm tasen nung asayar tajungtiba rongnung ka madak takok ngua tenzükbaji jangratemtsüka lir. Pa ya mapang talangka badminton asayar rongnung tajungtiba ta züngshia arur aser küm tetenzük nung pa madak takok anguba ajanga kanga pelar,” ta Srikanth-i ashi.
“Tan akokba ajanga ni kanga tasü aittsü aser tang nungi tezüka tarütsü asayatem nunga kanga junga asayatettsü. Ni pa den kanga bendanga agüja asaya aser ni ‘smash’ kanga jungasa zükloktsütet,” ta pai ashi.
Arishi küm 22 tain, Srikanth-i, taruba asayatem nunga tan amai meranga aser kanga junga asayatsü merangtsü, ta ashi.
“Iba takok sülen ni danga international asayatem nung temulung bendanga agütsütsü,” ta pai shisem.