Chozuba nung 1buba Khuniho Memorial U-17 Trophy tenzükogo

Phek, August 28 (TYO): Phek Deputy Commissioner, Kovi Meyase-i Chozuba jila nung August 28, 2017 nü 1buba Khuniho Memorial Trophy semzüktsüogo. Iba asayamung ya Satakha jila nung aliba 111 Bn, BSF ajanga asür Khuniho Sema, Post Commander tenüng nung ayongzükba lir. Satakha jila nung aliba BSF indang post ya kümzüktsü mechi asür Khuniho Sema-i anir par sepai tenet taküm bendanga agütsü.
District ana nungi sempet tajung alir lanurtem anidena shilem tajung agitsü nükjidong nung iba football asayamung ya ayongzük aser iba asayamung ya küm shia alitsü, ta asayamung ayongertemi ashi.
Phek indang DC-i iba football asayamung lapoktsüba sendong nung jembidang district ana nungi lanurtem asoshi iba ama tongtibang sendong ayongzükba asoshi 111 bn, BSF CO aser par team dang pelaba ashi. DC-i lanurtem dang nükjidong tulu yur asayatsü asoshi ajungshi.
Temolungtetba tulu, bendanga agütsüba aser yimya majungba ajanga asen state ya tanga state dang nungi tajemzükba jenjang nung lir, ta DC-i shisem.
Iba asayamung nung mezüngbuba exhibition match ya Chozuba town administrative staff aser 111 Bn, BSF tsüngda asaya.