Christian Higher Secondary School Golden Jubilee among

Dimapur, November 04 (TYO): Hokolbarnü Additional chief secretary aser finance commissioner, Temjen Toy, IAS-i, temelenshi bener arutsü onük nung ajaki sorkar nem tai tongloktsür, saka shingai pei melenshitsü atemabo bilema mali, ta ashi.
Christian Higher Secondary School küm 50 ajungba Golden Jubilee mong küm piyong agiyonga arur tembangba sentong nung jembidang Temjen Toy-i kaketshirtem dang, technology kang kera ainba mapang ka nung tarutsü atema kaketshirtemi renema alitsüla, ta ashi.
Paisa, tarutsü atema kaketshirtem aser school temi textbook aser exam dak alia inyaktsüla aser school temi ‘school building’ aser ‘building schools’ tetsüngdaji bendangtettsüla, ta ashi.
Paisa school-i iba alizüng tongtetba atema tenüngsang agutsüba den külemi iba school nungi nüngtugu nisung aika adokogo, ta metetdaktsü.
Kasa sentong nung NBCC general secretary, Rev. Dr. Zelhou Keyho-i, CHSS tenzükba sülen school-i aika inyakteta aruogo aser nija aser lokti aika nung temelenshi adokdaktsüogo, ta ashi.
School principal, S Moatemsu Walling-i, tang iba school nung kaketshir 3,000 dak tema lir aser tesayur den non teaching staff 100 lir; kaketshir 10,000 dak tema iba school nung züngogo, ta metetdaktsü.
CHSS ya 1967 küm amenoka liasü aser tesüiba küm 50 nung kaketshir 100 dak temai HSLC aser HSSLC tatidang nung top 10/20 jenjang ngutetogo.