Christina Grimmie asüpila sentong July 17 nü agitsü

June 15, 2016: Kentener Christina Grimmie asüpila sentong Hokolbarnü (June 17) agiba sülen la aliba yimti, New Jersey nung tasümang aremtsü.

Arishi küm 22 kentener, Christina-i 2014 küm US television talent show ‘The Voice’ nung shilem agia liasü aser taoba hopta arishi küm 27 tebur ka tenüng agi, Kevin James Loibl-i la kahset.

Hokolbarnü Medford nung aliba Fellowship Alliance Chapel nung la tedi Marcus densema lar kibong züngsemtemi tatemsa la nem akhüm agütsüba sülen asüpila sentong agir Hokokolbar aonungsa la mang aremtsü.

Osang ka ajanga, “Asüpila sentongji tila ka dang asütsü, lar kibong aser lar tembartem, dang adentsü,” ta ashi.

Christina den asüpila sentong indang osangji miimbanga dang lir ajisüaka tedi Marcus-i ashiba agi, Maroon 5 nungi tongti kentensang, Adam Levine-i la asüpila sentong nung sen teintokbaji pai agütsütsü ta nangzükogo.

Hokolbar aonung Christina The Plaza Live, Orlando nung ‘Before You Exit’ kentener telok den shilem agiba sülen 10:00 ako meta lai la sapurtem nem atema autograph sign tesüdak nung nisung kati la Kevin-i la kahset.

Iba tatalokba sülenbo nüngtugu nisung aikati parnok sapurtem ajurutsü arendaka bilemer.