Christina kahsetba sülen Meghan Trainor-i security akangshir

June 24, 2016: Tawa kentener, Christina Grimmie-i la sapurtem atema autograph sign sütsüdang tebur kati la kahsetba sülen Megan Trainor-i la kümzüka alitsü atema security akangshiogo.

Taoba mapang The Voice U.S. finalist arishi küm 22, Christina ya arishi küm 27, Kevin James Loibl-i June 10 nü Orlando, Florida nung kahset. Iba tatalokba sülen Drake aser Selena Gomez densema celebrity aikati parnok sapurtem majurutsü lemteta liasü.

Iba dak alia ‘All About That Bass’ kentener, Meghan Trainor-i la sapurtem ajurutsü tsübur ta osang angazüker.

“Anogo ana sülen (Christina tepsetba sülen) ni sapurtem majurutsü ta ni bilem, tangbo ni kanga tsübur,” ta Megan-i New York Post osangbener dang ashi.

Music industry nung kentener tasen ka ama tamasabo Meghan-i mapang ajak nungbo la tanükertem mayu, ajisüaka Christina tepsetba sülenbo la taküm kümzüka alitsü atema lai la security akangshitsü lemtet.

“Onok security junga alitsü atema inyaktsüla. Ni tang tashi nungbo artist ka makü. Mapang ajak nungbo ni security mali, ni ‘tebur’ ka alitsüla asü ta ni ozü telok dang asüngdanger. Ni ka ayutsüla asü ?’ Ni aiben security makai senzür, aser ibaji nenoki memetet,” ta lai ashi.

“Tawa ni ayazüka ao aser ni sapur kar atema autographs sign sütsü, aser iba atemaji ni pelaa bilemer. Ni kümdangtsü nüngdak, ajisüaka maneni ni iba ya inyaktettsü. Ni aliba tsübutsü menüngdak,” ta laisa ashi.