Christmas

~ I. Supong Longkumer, Darogapathar.

Christmas ya alima benjong ama aikati bilemer, tongtipangsa tila tanurtemi, kechiaser tsüraburtemi Christmas benjong mong nung asemtsü süoshi rememtsür aser telok telok chiyongteptsü küm tipiyong sentong renemteper. Anungji alima benjong ama ka angatetdakja lir. Kodak nungbo Yisui tasü madak takok ngur shia aruba mapang tambur metsür pezüi Yisu tsüngdang apudaker takok ken tenloktsüba J.Adok 5:1-14 angutsü aser iba benjongji kanga tulu lisasü ta angateter. Yamaji meimchir atema taküm bendanga agütsütsü alimai aruba anogo. Anungji alimai benjong tulu renemtsütsü pa agi tetemsü. Saka alimaibo pa magizük nungji ajaki masü pa dak amangertemi dang tasoba benjong mongtsür ati.
Kotak pa menden, alima pa tetsüng ajemetdak ta lai nung ashiba dak alaka tanga lima petinu nung meimchir aliba kecha nunga mali, anungji Tsüngrem luji alima ya tang. Alimatsür katiang Yisu sodaktsüba ya tetezü atemata masü ta angateter. Pa sur kelen Ijepi lua jenokba ya temenen limai tasütsü aruba. Kechaser Ijep dang temenen lima ta ajar, Mari nem sodaktsüba tetezü meimchir ajak mulungjang nung sodaktsünüba. Kechaser pa asodang oja tejep ta mashi saka tetsür tejep ta shia lir. Ano tetsü o tebu na den Pa küm terana mapang parnok yimsü ama Yirusalemi benjongdaki aoba mapang benjong temer par yimdaki meyipba aodang pa mali asü, anungji tsürabur kanga tang shisapulua yirusalemi meyipba bushia ao, idangji pabo tenla kidang tesayurtem ten o anga-a asüngdangtepba mena angu. Anungji tetsüi tebusang, kechiba nai yamai benshi? Nübo kenabo temulung mekai na bushir-a tu ya ta pa dang ashi. Saka Yisui parnok dang ashi, kechiba bushia liasü, ni kübo kidang alitsü ta nenoki memetet no ? Saka tsüraburi aji mangatet. Luk 2:49. Tetezü nisung shia dak pa lidaktsünür kechiaser tetsü o tebu naji tsürabur den ama jembia mangur. Ano kenü anogo pa tetsü o tenu nungertemi Pa bushia ao saka majurutet, saka pa anasa alitemi nütsü aser nenu nungertemi na ten ajurutepnüa kimalen nokdaka lir ta ashi, saka Pai parnok dang ashi, shirnoki Tsüngrem o angashia inyakdir parnokji kütsü aser kü adianu lir. Luk 8: 19-21. Yisuji par chir aser adianu saka parnoki mangatet tashi parnok Pa meyong masü. Ano kenü anogo pa adianutemi Pa dang ashi nü nütsüngtemia nai inyakba mapatem angutsüsa yang nungi Yihuda limai meyiba oangma, kechiaser shibai pei sasa odia temai atokdaktsünür pai kecha miima meinyaker. Nai itemi inyaker sura alima tsüngdang nüsasa jungkai adokdakjangma, kechiaser pa adianutemi pa dak mamang. Yohan 7:3-5. Tetezü Yisu dak amanger ama saka temulungjang nung mesodaktsüra Yisui sayuba ama meinyaktetsü.
Kenü anogo tetsür ka nüktapangtaya lia Farisi aser tezülurtemi pur Yisu dangi anir arua laji Yisu aser parnok yongtsü nung nokdakdaktsü aser Yisu tai aputsü atema Pa dang asüngdang, nüktapangtaya alirtem pura long agi onseta intoktsüla ta Mosai agütsüba ozüng nung lir, anungji la atema nai-a koda ashir ? Yisui ashi, shiba dak temenen mali pai tama ondakjang saka shingaia monteti senshiadoker liasü. Yisui tetsürla tang asüngdang, parnok kong ali ? Shingai-a na maitsü asü ? Hau shingai-a ni maitsü, ta lai langzü. Yisui ashi ni-a na maitsür. Oang joko temenen tebenshi. Yohan 8:3-11. Farisi aser tezülurtemibo Yisu tai aputsü sentong liasü. Yisu temeimi temenen jendi nempangtsüba mapa jungkai adoktsü.
Yimjung masü nok adokdaktsütsü ni aru ta Yisui ashi. Mathi 10:3-4. Temenen tasa asur temeshiba tasa kodanga longjemtsü makok. Anungji ajak mulungjang nung Tsüngremi Yisu sodaktsünür.
Ibaji Christmas.