Christmas Amsang Ronem Mongpu-EDEN ATSÜKI

~  Talitemjen Imchen.

Oh kü meimla, nai Eden Atsüki ngugoma.’
Kü arishi mapang ni ajurutsü asü.’
Takar ki nung kioseti sentsü prangshir.
Sensaker ki nung mokozü alonger.
Nisungi inyaktetba nung pelar asü.’
Chubai tanüker teperi anir senzübaji,
Kechi nung mulung alemdak aka.
Ola tulu adoka benjongtepba nungi,
Süngdong nung alushijak asaba ola tanangba.
Nok o nü tasen tendangtetba nungi,
Meshimetsür nem sen ka tsükdaktsü anisüngzüker.
Sensaker kodang tepu mesünga senzüdir,
Kü mulung nung Eden Atsüki jangjashir.
Arung, Eden Atsükii meyipa odi.

SANGRO RATET
Taren ka nung sangro tenzükdang, “Oh kü meimla” ta alibaji sangro mejemer (poet) den shiba anasa lir. Iba nisungji pei meimla ama tenük sünga meimba olen lir. Poetji tebur asüba agi “Oh kü meimla” ta amshia züluogo. Eden Atsüki nai ngugoma tetezü “Naia Teputep Aser Telungjem Aliba Lima Ka Ngugoma” ta asüngdangba lir.
Taren ana nung, “kü arishi mapang ni ajurutsü asü?” tetezü iba teraksa lima yagi EDEN ATSÜKI ama kenübo “Teputep Aser Telungjem Lima” melener temulung sadoksadoka litettsü asü ta pongmangba lir.
Taren asem aser pezü nung “Takar ki nung kioseti sentsü prangshir, sensaker azü ki nung mokozü alonger” ta alibaji, takari senti oset balala nung rangloker aser tali akar. Saka sensaker kidang chiyungtsü meperiba agi, kibong nung temeim mokonga kümer, chacha nüngnüng adoka asaprang angashiba nung MOKOZÜ ji amshiba lir.
Taren pongu, trok aser tenet nung, “Nisungi inyaktetba nung pelar asü? Tulurtem tanüker teperi anir senzübaji, kechi nung mulung alemdak aka” ta alibaji nisungi pei ajungtsü aser ulutsü dang inyakteter, tangar atema aria mebilemer. Iba jagi kodaka ulua inyaktetdir, padakaji pei asoshi tanüker nüngdaker saka anisüngzük mangur.
Taren ti aser teku nung, “Ola tulu adoka benjongtepba nungi, süngdong nung alushijak ola tanangba” ta alibaji takar shisanga, benjong tulu lalushiponga agütsüba ji tetsüremtsüka lir. Saka süngdong nung alushijak ozü ola angaba jagiang pei mulung süneptsür.
Taren ter aser ter ka nung, “Nok o nü tasen tendangtetba nungi, meshimetsür nem sen ka tsükdaktsü anisüngzüker” ta alibaji tangar metsübutsü atema raratepba oset tasentem renema ayuba ji mezümeküm mapa. Saka timtemer nem tenla balala agi yariba ji ajemalu lir.
Taren ter ana aser ter asem nung, “Sensaker kodang tepu mesünga senzüdir, kü mulung nung Eden tsüki jangjashir” ta alibaji sensaker kodang tepok sünga chiyunger aser pelatepa senzüa ngudir, idangjiang yimjung lima ta ajatsü akok.
Taren ter pezü nung “Arung, Eden Atsükii meyipa odi” ta alibaji tetenzüklenbo Eden Atsükiji liasü. “Teputep aser telungjem” ji liasü. Saka liyonga arudang nisunger merumeru aser ampangyim balala ajanga aji samadaktsü. Anungji nübur tsüngda, “Teputep Aser Telungjem” nung alitsü tenzükdi ta EDEN ATSÜKI tenüng agütsür sangro yangluba lir.