Christmas amsang teronem

– Talitemjen Imchen.

(Tir Yimyim azünger ajak dangi 2016 Christmas mapok amsang lemsateper)
Chila nungi tatsüka pilar aliba yim tila ka nung amitsür ka liasü. Joko küm tatempang buba ita ta bilema aruba mapang ka, anüng itaji naria aküm. Yimertem teloktesen balala nung mazüngi inyaktep. La taküm jia Christmas matongdang mapa ajak tiptema renemer atatsü asoshi, mazüngi wadang balala nung noktak. Lai hombar nungi tenzüker hokolbar anogo tashi, kidang animesüngzüki alu wadang balala nung mapang indok. Akhi ama alu nunger den densem sako süa hokolbar nikongtsütsüji adoka ki atong. Soruchioktsü mi aputeta yur jangpongji lapoka reprangdang nung, joko jang senteta akabaji tekapu asemjika dang angu. Yakta dang tekapu ka sünga jang ji chipo nung inoka sorur, jangratema chiyung. Iba sülen chipo aonpoji shidokshirar tipdema pei pei takdang nungji ayu.
Anü ia manglika akümba den tetsüng teka merükshir yipdeni oa ondak. Asükwa tsüngküm mapang, azüngtzü aluba den mopung temokong sensena ait. Joko alima ji temokong mapang tenzüker ta bilema, mi tera ulushia apu aser süpu sü jagi temang ji apushir, tasüngnü kechi inyaktsü ta rataa ali. Hopta tepiyong mapa inyaker asünung, honibarnü jibo kechai moi anisüngzüka amongtsü apitet. La kidang amongba mapang, tsük apur senteta ayutsü aser küm piyong bendena aruba rongsentem asadangtsü bilemtet. Paonungji yakta dang nangnanga amozüka ao.
Anepdang la sakdang atep mi ji remsepadoker liasü saka anütsüng adoker iba jagi temangji terabo alemer ama bilem. Nükla nung yasüng tinyaktsütem yimdangi arua, menürem jakden nung soruchioka chiyunger, kimalen ji anü talangba apushir ta bilema, pakti ji salar ayu. Lai melok ji agizüka chi nungji inoka bener ilonga jen bushia ai. Jen ji lapoker külen anüng tilaba nung mapok tsük melok ka shi aliba ji ngua, mapang tajung ka nung senteta achitsü ta metsü atsüka reprang. Anasaba taktang nungji, maipu tsük melok ka sünga bener adoka kimaji putaka ayu. Pakti nung melok ka putakba ji alaka, jen nung ajak agi melok teko shi anünga ayuba jangjaa bilemtet. Iba sülen sünglangi lua taktang ji reprangdang nung, manü ji chi asem jungnüa liasü. Alui aoba shia süng bener adoka, tsüin nung ayuba süngki ji süngnang sünga ngur temolung kanga sünga pela.
La tepela agi tera nemnema tsüin nungi kilungi ayaket aser juli ji reprangdangtsü bilemtet. Lai küttsü ji lapoker juli nung aliba ji züngdanga, sen tatsük metsü züngtet. Tanabena milongi süngjemshir züngdang nung kasa tatsük metsü liasü. La kisüng dang asünung, akhi ama tanemi nemnemtsü mesüra temolung nungdang pelatsü melena tepela agi, “Taküm nung taküm küm sen timtiba bendentetogo” ta memeteti ola tuluka adok. “Ni ken kenbo ola tulu adoker ji kidangertem kecha maoksali” ta ano la sasa apijema bilemer anen. Küm piyong ayanglen nungi aruba sen tatsük metsü nungi, tenla tatsük ana abentsü agiteter ayu. Tasüng nü deobar asünung, deobar abenba süpusü tasenba den külemi yipden sü ji bener lua kima anü nung pudaka ayu. Alu mapa tulu inyaker masü ji, kidang amongdang yabo anüngdang soruchioker mechiyungli ta bilemer, sünglang nung aliba manü tarak maket tesüsü ana shimteta, mimong nung inoker aot talem jagi nempanga ayu.
Anüng nung mepet tanak tila kata mali, anüi sashia puloktsüba ji ngua, anogo tajung ka shimtetogo ta menerüma tsük ji aishitsü kimai alu. Oji nungi an telok küma sendener pakti nung aliba tsük ji chiya angu. Aoksar jendaktsütsü mechi, kima lungsang kar shia arur lungsang jagi ondokba mapang, kidang entsü tamokdak tetsüdi ji, entsükhu nungi yimzüka alu. An tetsüdilai mapang shitak apiteter tsük achitsü aluogo ta bilemer, tsük ji tetsüdila chinü chidaktsü. Iba mapang entsükhu jagi tua reprangdang nung, lai kenü entsü ka, “Kü Kisüngi Dang Chiadoktsü No” ta apayua bilemer yutsüba ji densema entsü ter züngtet.
Joko anü ji teroto tsütsü küma yalok. Lai pakti nung putakba tsük ji arar alitsü yimdangi aru. Kidang meshi nung manü wanga ayuba tua bilemteta, terabo ayar ta kima noktaka aliba mapang, tambur ka ajok mechir lokaloka süi. Tambusangi an entsü amokeri tsük achiba ji ngua, “Entsü kar danga mokpetra kü nem yujang” ta kanga dang imlaseta asüngdang. Pa tereprangtsü nung yaa senzür ama angu. Lai asema kidangi tur mimong nung aliba manü ana ji bener alua, tambusang nem ka agütsü aser la ka achi. Tambusang ji kanga dang anisüngzüka la anasa mener, “Tanep sangwatsü mapang remso pongmang pongmangba ataloker” ta la dang pongmang ji shia manü ji achi. Iba sülen tambusang ji tekümkümba nung teka tabenleni ajok ji mechishir noktak. Saka tenüki anü sangwa ji metizük, tenütsüleni teka tachichi tua akhüm yanglur menerüm jakden nung yimti yimtong ji penzüa apuso. La tenük ranglokba ji masetshii tambusang lenko ji mesüitem tashi repranga ali. Aser lai agütsüba chiyungtsü pai jangratema achiba ji bilemteta temolung tepela agi asüng.
Paonung yipden nung ondaker, anogo piyong ajurua inyakbatem ji tanaben tepela nung ken bilemtetshir, ano tasüng nü deobarbo tekülemi tatsük ana tenla bener aotsü alinung, anogo ji yakta arudaktsünüa yongyadang memeteti amozüka ao. Anepdang saker temang merükshia renemshir, deobar abenba süpusü tajungba ji lemlema aben aser juli nung tatsük ana ji inoka bener, tekülem mapang tera matongjongi kidang nungi apuso. Tekülem kidang tenla balala bendena arudang, laa küm piyong bendentetba sen nungi ter shilem tatsük ana ji, kanga dang tenük sünga arogo juli nungji inoktsü. Sannükeri tekülem mapang, taruba mongolbar aonung temolungertem Christmas ken tena yimtong süa jajatsü ashi. Iba sülen bodbar nü Yisu asoba anogo benjong koda tulu tatongi ashitsü tenzük. Sannükeri jembiba onük jagi la kanga jangradaktsü aser taküm nung benjong tapu aika ajuruaka, Christianpur ka asoshi Christmas benjong ji temaba aser tulutiba ta angatetdaktsü. Lai Christmas benjong ji taküm nung benjong tulutiba jenjang nung amongtsü temolungtetba agi. Aser nükla nung kidang akabatem bilemteta, chiyungtsü tasen renemer kiyonger den lemsatepa, tematiba jenjang nung Yisu asoba benjong ji pelatepa amongtsü temolung akangshi. Iba sülen deobar tekülem senshitsü matateti temolung nungbo kidangi aotsü jangjongmaraa ali.
Kidang chiyungtsü tajungtiba renemtsü talangka shisadanga bilem. Saka la molung süa mebilemtet. Tesüsüa, teküpoklen mepu nungi mapok amsang ronem, mapangshia ki tashi mopungsem atuba bilemtet. Amsang mopungsem nung menemshiba shia, lai sünglangisa lua noktaker kanga chidangnüa teronem ji penzü. Tangari inyaktetba mapa ji, benjong tuluka tenüng nungbo lar kidanga akoktsü ta lai tamang takang ayu aser Yisu asoba benjong tenüng nung, mapok am asangtsü atema asameyang tenzük.
Tasüng nü hombar anepdang jen lapoka ir, mapok tsük melok ka shi aliba ji agiteter anü nung putak. Aser nikongtsütsü semki nung tera senteta, wanutemji sepdoker tzü nung medena yur milungi kongdaktsü. Tanaben am küma tongsar susa ka nung ayu. Iba sülen juli nungi tatsük ana agiteter, tesadang ka Yisu asoba anogo nü tenla abentsü ayu aser tatsük ka ser tesadang (1.50) agi totzü alir ayu.
Mongkolbar aonung ji nikongtsütsü chilia chiyunger bodbar nü “Yisu Asoba Anogo” nü asoshi kiyonger den lemsatepa achitsü am asangtsü tenzük. La mazüngi totzü tatsük nung am inoka asangba ola agi kecha mangashii, ammang aru ji memetet ayaterm kümdaktsü. Kenbo meta nungi, “Arung Yisu Kü Molungjangi” ta telok ola tila agi tena angashi. Parnoki atenba ji angashir sannükeri tekülem kidang ashiba bilemteta aoksar yimdong süa jajartem ji reprangtsü kimai alu. Telok nungji tanur tain putu nung adener, madener kecha mesükshii pei pei süputsü balala kanga tobur junga sobur angu. Aso tulu kati asem tuluka ajonger, asem ji tema tepela tulu nung ken ji longsolongsoa tenyonga, lar kima lendi ji süi. Laia kanga jangraba agi kima süidang ji, telok denji külemi tashi agi ken ji tenloktsü. Parnok süir külen kidangi meyipa tatui, tsüin nungi mopungsem nung mapok amsang menemshi. Lai “Yisu Asoba” mapang amsang ronem menemshiba ji onsara tepelatsü ta bilema, tepela agi sünger temalen nokdakdak tesem bushia sünglangi asema alu. Kenpika sünglang nung nokdaka lir, kecha memenemtet mepongsem ronem ji mali kilungi ait nung lar atep nungi amsang ronem ji adokya liasü.