Christmas Jeli Osang

– I. Rongsen Jamir, Ex-Pastor Dhansiripar,

Christmas osang angar dangi Kibuba Yisu temeim salem abener. Temeshi Lai Tsüngrem O nungi azünger Mat 3:1-3 “Aser item anogo nung baptitsüba arua Yihuda arem nung sayutsüngia ashi, Nenok temulung meyipang kechiaser Kodak yimli anasa lir. Kechiaser arem nung kati ayimtenba ola nenoki Kibuba lenmang renemang, Pa lenkong metongmetonga yangluang shiba indang Isaia ainkari ashi ibaji pa”. Yisu asotsü jakdang Tsüngremer sentong nung Yisu asoshi baptitsüba Yohani Yisu agizüktsü asoshi nepur ajak renema atatsü dang azüngba Tsüngrem oji lir. Küm shia Yisu asotsü benjungmong atema nisungtemi taputapu renemteper, saka benjungmong atema renemba dang nungibo asen ajaki Yisu agizükba benjungjiang kanga agia tajangzük lir. Baptitsüba Yohani dang azüngba lai nungji terenemtsü asem shia lir.
1. Mezüngbuba nung Kodak yimli ochi yimsüsüba yimli abensang, Yisu arudagi, Pa agizüktsü asoshi temulung meyipang ta ashir. Oda temulung meyipbaji tanga kecha masü saka pei inyakba mapa tamajurng aser tai temenen asoshi jashia, pei bilembatem ajak nungi temulung meyipa toktsüba dangji ajar. Tanü takar makar ajak pei yari Christmas asoshi kiojen aser lenmang tapu aika tang yabo renemogo südi. Küm meyi anashi ogo, kodang asen Kibuba Yisu asotsü osang aru iba mapang nung Rom sorkari Census zülutsü ozüng agutsü iba mapang Bethlehem yimeri ainer aika arutsü ta meteta ki aser lenmangtem satema yanglua ataa liasü, iba nungji asen Kibuba Yisubo tanendak ki mali asü.
Anungji Pa nashi ki ka nung aso. Tekülak azü tokshiba anemsü shisatsü agi sünger tema tazütsü Christmas renemba nungji asen Kibuba Yisu talidak makatsü. Saka asen Kibuba asoshibo nü mulungsen temerük aria belemtsüba temulungjang renema atabaji tongtipang lir. Iba kümia nai adianu anema tamajung belema ali asü, itemji asen Kibuba anema liasü ta bilemtsüla aser item nungji jashia temulung meyiptsüla aser item ajakji toktsütsüla kechiaser Kibubai yamai ashir, ” tang danga nenoki jepa mang yima kü dangi meyipang, kechiyong pa taochi aser temeim aria belemba agi sünga lir, ain adoktsü meilongi aser pa imlibilem agi sünga lir aser tamajung inyaktsü nungi pai atsüanem akar”, Yeol 2:12-13.
2. Tanabuba baptitsüba Yohani ashi, nenoki Kibuba lenmang renemang. Ibai national highway mesüra state highway ulushia yangluba ashir masü saka Kodak yimli alima nung lemsaa aliba aser nübur rongnung telemsatep malitsü, tetsübutep, tarishitep, azü tokshiba malitsü, kati ka dak temulung melemtep malitsü, temeim agi sünga ajak den kasasa memetsüdaktepi sadema jajatsü iba Lai ajanga baptitsüba Yohani aben. Iba den taküm nung Yisu agizüka Pa osang abenba nung na amshitsüsa ner kibong renema liang ta Tsüngrem oi ayongzüker.
3. Asembuba nung baptitsüba Yohani ashi, pa lenkong metongmetonga yangluang Tsüngremi Hagai ainkar ajanga yamai ashi. Anungji tang temeranger Kibubai ashir, nenok lenmangtem bilemdangang. Nenoki jenti prok saka tera dang bena aru, nenoki chiyonger saka tebok masünger, nenoki ajemer saka tzüra matemer aser nenoki abener saka shinga talembo mali nenoki sen bena arur saka juli tapok nung inoktsü bena arur, anungji temeranger Tsüngrem Kibubai ashir nenok lenmangtem bilemdangang ( Hagai 1 : 5 -7).
Adianutem tanü asen Naganunger kija aser lokti bilemdangtsü mapang tongja tongogo. Lenmang kolakoshi aikasa lir, lenmang kanga mejungi küraka lir, lenku shia nungi tarur taoer kanga mejungi tsükdakteper kolakoshi aika kumogo. (1) Ochi mashi agi chuba menden yanglur aser rongsen bushitepba kati ka ashioktsüteper. Azü tokshiba mapa tamajung inyaktsü asemteper. Ochi mashi rongsen rakzükratemtsü konang ama marendaki bushiteper. Tagishi maka, sensaker mokokmeiner indang tiyazü agi raktepa chiteper. Iba ama tekürak lenmangtem nungi bendenba rcngsen agi ki tajung yangluteper aser iba kitem nung kinungtsü aser jala jabaso den jangratema meliteti tashidak tamajung agi kangshitepa iba tekürak lenmang nung taküm samaogo. Anungji tanü asenok jajaya aliba lenmang yabo kanga lenko tamajung aika lir, iba atema kanga junga bilemdangang ta Hagai osang agütsür aser Kodak yimli osang abensang Yisu yangi marendaki jajatsü. 2016 Christmas nü jakdang arudagi, nai kwiben Christmas amonger nai metet, taküma koma terenemba mesüra tangatetba nung na Christmas amongtsü renemer. Saka adianu temenen nungi temulung memeyipi shi azü pela nung Christmas amongtsü lira na akoksatsü. Anungji Tsüngrem den yimjung aser adianutem den yimjung nung Christmas amongtsü ayongzüker.