Christmas Mongpu

– N. Imo Longkümer.

Küm shia tatembangbuba ita December koba nung asenoki Yisu Khrista asoba bilemtetba Christmas amonger Khristantemi küm tetenzük nungi iba mongpu nung Christmas anogo ngutettsü tamang teimla ayur. Kechiaser Christmasji atamata anogo ka masü. Kibong ajak terneshiba tulu akar. Aika tanüla nung renemshia ataba tongtipang anogo. Temolungertemi rongsen jenti endoka nübor den lemsateper aji koba tepelatsü, Tsüngremi aji ajioka ayur aser meyipa moatsür.
Christmas decoration atema Arogo aikati kiyong shia sen jenti lemzüka agütsür aser ibaji 1st, 2nd adoktsü toktepdaktsür. Anungji ano kiyong shia saru balala sarua anogo ishika atema iba decoration yangluteper. Iba atema alidenba aser yangludenba osetji sen jenti alang. Kiyong ajak sangwaa yanglur saka idakji tepela mepirir. Kechiaser Arogoi tendangtsü aser 1st, 2nd shimtettsü. Idangji kasa timtem agia inyakba tanüngbatemji tangar sullen anishir akümer aser peii yangluba decoration nungji mepelar. Christmas nung Decorationjia nüngdak. Ya akhi yimya ka (old tradition) saka Christmas nung Khrista tuluba asü decoration tuluba ?
Koba arogo nungsa decoration atema sen lemtsür iba nung artsüdang meyoki kiyong shia pei-i kechi koda yanglur idakji ajak temulung süa pelateptsüsa inyaksa tajungba südisü ? Pei mapa agi pei molung süa doktsübaji ajak dang tajungba. Sentsü tapu balalaa keta yangluteter liaka ibaji teshimdokba nung aden ta asüba nung tepela mali. Competition spirit enoka artsüdang adokdaktsüba mapaji iba nung yabo kanga tapetbo masü ama bilemer.
Paper azünger ajak dangi Christmas tepela salem.