Christmas ronem

– I. Supong Lkr, Darogapathar, Dimapur.

Asen Kibuba Yisu Christa dak amanger shia tangi tepela Khristmas salem jelia lemsatepba sangoktsür.
Tsüngküm mongpu ajak nung süngdonglidong süngpen aser naro tapu ajak pei mapang nung aponger aser item ronem agi meta shia nung lemsa-lemsa menemdaktsür. Saka item ronem yabo par mapang dak alaka sama aor aser kar agibo kolak kori menüa shirangdaktsür. Saka kodanga sama maoba ronem ka lir. 1871 tashi nung iba ronem ya Aori memenemteti liasü. Iba mapang tashi Aori Oa Lijaba, Meyutsüngba, Anüngtsüngba, Longditsüngba dak amanga liasü. Iba dak nungi teronem masü tammang dang tali manga liasü.
1872 küm 22nd December nung Molung lima alir dak sama maoba ronem agi kongshir külen taküm aliba Tsüngrem o dangi meyipba temeshi tanüla milak jangruloker tanü ama Tsüngrem o nung tazüngba meliaka tamang agi asen Aor dang masü saka tetsüng agi tonga otetba kin ajak nem Tsüngrem ronem agi kongshidaktsüba agi alima yamoka lir. Aji oda süaka meimchir ajakibo iba ronem ya magizüktet. Tsüngremtem madak Tsüngrem, Chubatem madak Chuba, Kiburtem madak Kibur ta jempiba yabo meimchir temi pei mulungsü Tsüngrem yangluba agi jempir ashi teyanglur Tsüngremibo pa dak alima tangar Tsüngremji züngoka mali südi. Kechaser pai anüng aser alima yanglu. Anüng sentsüprangji pa sentsü wangshi atema, alimaji pa mapa metetdaktsütsü atema, tema telong ajak nung chiyongtsü aser senti rongsen tazü jenti rema yuja lir. Itemji pa taküm o aser teka mapa. Pa mapa metettsü aser angateta taküm lidaktsüdang pa jungkai adokdaktsütsü, tazü agi tamen küma agidaktsütsü atema pa mesük aser pa ama meimchir yanglu. Pa mapa apibo nisung tsütsü nungi kanga tetsübutsü Tsüngrem lir, saka “tetsübu kechiaser ajiang, ni nenok dangi tepela osang tajung tulu pena arutsür “(Luke 2:10).
Iba ronem jagi :
1. Tebu Tsüngrem mapa aser temeim angatetdaktsür.
2. Kanga tang temekong asükwa kangtena mokrema asükba ama iba ronem meimertem tila küma ajem aludaktsür aser azüoker.
3. Iba ronem jagi yazü yapong jembia tsübuseta alitsü melena tasü tait aser tashi tait kümdaktsür.
4. Iba ronem jagi sentsü melena topur junga kümdaktsür.
5. Iba ronem jagi ochi meimdaktsür.
6. Iba ronem jagi shi nung aser tanüla nung sensaker ajak takar kümdaktsür.
7. Iba ronem jagi tejak merpranger aser temenen dang maa ta shitetdaktsür.
8. Aser pa madak kibuba tanüla shitsatsü, aser tangatetba akaba tanüla, teshisadangba aser tashi akaba tanüla aser temetetba tanüla aser Kibuba aküm tsübuba alitsü tanüla (Isaia 11:2)
Khristmasji Yisu sütetba iba ronem jagi alima akoker. Tsüngrem sangang Pai moatsür.