Chuba Putirtem

Nenok teshimetetba kin, chuba putir telok, temeshi kin, aser Tsüngrem pei agitsü purtem nenok lir. 1 Peter 2:9
Na Khristan ka, süra na Tsüngremi shimtetba putir ka lir. Chuba putir ka ama na maneni chuba dangi aotsü lemang lapokja lir. Ne taküm nung nüngdak adokra, na atema tetsüngdai air putir ka bushitsü menüngdak. Na chuba putir.
Aji oda süaka putira, pa mapa lir. Putir inyakyim kübok putir kati putir mapa inyaktsüla. Laishiba nung putir kati kija inyakyim amshitsü shia mali, pa balaka tenzükba mapa mali. Putirtem külemi mapa inyaker (Lev. 9:1). Lairen masüba kija mapaji Tsüngrem putir kübok pai bilemba mapa nungi pilatsü akok.
Nübur matsüngdang putirji Tsüngrem melen noktakba lir, saka pai ano Tsüngrem dangi nübur tebilemba abener. Na meketa kar Tsüngrem dang mepishitsütsü putir sarasadem nüngdaka lir asü? Karbo ne taküm nung Tsüngrem angu nung dang Tsüngrem metetta arutsüba alitsü akok. Khristaji shidakba taküm lir ta pa nübur taküm agi sayuba alimai nüngdaker. Tsüngremi ajaba dang nungi asen mapa temaba südaktsübaji lendong lir. Asenok mezüngbuba putir asütsü aja, aser tanabuba mapa ka nung sotdaktsü aja. Kodang asenoki ibai meinyaklir asen meketa alir ajaki asenok ajanga Tsüngrem dangi aotsü songtemtsü. Tsüngremi secular mapa kati ajatsü akok, saka iba dang nungi talisa na Pa putir ka asütsü shimtet.