Chubai teyi Ato Kilonser menden atema tokteptsü nokdang

Bangkok, Tsüklai/February 9 (Agncies): Thailand chuba Maha Vajiralongkorn-i teyi Ato Kilonser menden atema tokteptsü sangdongba nokdangtsü asoshi jenjang agiogo. La opposition party nungi tokteptsü asoshi shimba ya tapet masü aser temzüng ozüng anema lir, ta paisa ashi.
Chubatsür Ubolratana Rajakanya Sirivadhana Barnavadi-i Hokolbarnü par party nungi Ato Kilonser menden atema tokteptsüpur la dang ta sangdongba ajanga linük ajunga aoksadaktsüogo. Lar party ya taoba Ato Kilonser Thaksin Shinawatra sülen anidakertem lir.
2014 küm military-i coup süa Thaksin sülen anidakba party atsüngtokba sülen la PM menden atema tokteptsü sangdongba ajanga tang aliba sorkar amokmerenogo.
Ajisüaka chuba Vajiralongkorn-i iba jenjang agiba yimjak nung anemba sülen Election Commission-i la disqualify sütsütsü mesera lai lasasa atsüngintsü akok.
Thailand ya 1932 küm nungi constitutional monarchy ka lir saka chubar kibong yagi shilem tuluka agir.
“Chubaer kibong nungi jenjang temaba nung aliba züngsem ka politics nung shilem agibaji linük sobaliba aser inyakyim anema lir anungji iba ya tim masü, ta chubai ashi.
Chuba Vajiralongkorn-isa constitution nung provision tem tetshia ashiba agi, monarch ya politics tema nung lir aser yimden yimsüsüba tsütsü shinga mepumesemi teyongtsü nung dang alir.
“Chubaer kibong nungi züngsemtem ajak kasa inyakyim nung anidaker aser political office kecha mebentettsü kechiyong iba ya constitution anema lir,” ta paisa ashi.
Candidate tem tenüng sangdongtsü atema Hokolbarnü ya tatembangbuba anogo liasü.
Ato kilonser Prayuth Chan-ocha (army chief) shiba lenisüba kübok 2014 küm sorkar coup asü aser tang junta tekolakba lir, pai Hokolbarnü PM menden atema tokteptsü sangdongogo.
Ajisüaka Hokolbarnü mepetmesü ajak tembangdakja Thai Raksa Chart party puri, chubai PM menden atema chubatsür tokteptsü nokdangba akhümtsübua agizüktsü tenangzükba agütsüogo aser iba ajanga March nung election magi tsüngda tang yimsüsüa aliba sorkar jenjang tajungba kümdaktsüogo.
Chubatsür Ubolratana PM menden atema tokteptsü asoshi telemtetba agiba ya la tenu chuba Maha Vajiralongkorn-i anemba sülen tang iba osang agütsüba ajanga la iba menden asoshi metokteptsü jangjaogo.
Thai Raksa Chart party shirnok Shinawatra political clan den sendaktepa lir, parnoki Hokolbarnü chubatsü parnok candidate asütsü shimba sangdonga liasü.
Chubai iba jenjang agiba anemba sülen Thai Raksa Chart puri Honibarnü nüboyimba sentong ka akatsü ayonger aliba thitsü aser parnoki sobaliba aser chubaer kibong inyakyim akhümtsübutsü ta sangdonga ka ajanga metetdaktsü.
Thailand nung linük ajak rongnung chuba ozüng tesashitiba benshir aser chubai jembiba oji tatembangbuba ta züngshir.
Ken o asadangertemi, taoba anogo ishika tsüngda tatalokba ajanga tang aliba sorkar nem teyari agütsütsü aser parnok lenir Prayut Chan-O-Cha jenjang tajungba kümdaktsütsü.
Prayut, Phalang Pracharat party nungi PM menden atema tokteptsü shirnok tang ayimsüsüa aliba sorkar den sendaktepa lir.
2014 küm coup süa sorkar kümtetba sülen tang mezüngbuba march ita 24 nü election agitsü asoshi renema lir.
Kasa mapang nung arishi küm 67 tain chubatsüri chubai tenokdangba agütsüba indang kecha mejembi saka ashiba agi, lai Thailand tejakleni odaktsüner.