Chuchuyimlang circle nung aliba yim pezüi Govt-i yokba teyari magizüker

Mokokchung, Aug 26 (TYO): Chuchuyimlang circle kübok 2015 nungi 2018 küm tsüngda alima yimya lendong ataloker kibongtem asoshi sorkari teyari yokba relief jang (rice) kibong shia seret 50 kg aruba magizüktsü telemtetba agiogo, ta yim pezü; Chuchuyimlang putu menden, Salulamang putu menden, Yaongyimti Old council aser Yaongyimti New council telungjem senden ka Chuchuyimlang yimdak senden ka mena osangzülurtem den jembidang mepelaba metetdaktsü.
“Lendong tulu ataloker rongsen jenti tesama ajurur kibongtem asoshi teyari jang bag kaka (50 kg) aruba yabo onoki khenyongi temulung masür aser kanga mepelar, anungji, onoki ibai magizüktsü lemtet”, ta Chuchuyimlang putu menden chairman, Aosanen Pongeni metetdaktsü.
Osang angashia iba teyariji August 13, 2019 nü tagizüki ao, saka kibong shia jang bag kaka (50 kg) agütsü, anungji, lendong ajurur kibongtem den yimsüsürtemi teyariji magizük telemtetba agi aser tanü ano yim pezü sanger telungjem senden ka mena yimjak nung metetdaktsür, ta parnokisa ashi.
Iba dak sentakba nung “Govt-i hopta ka tsüngda nung telangzüba tajung ka magütsüra, area pur ajak jembiteper telemtetba agitsü”, ta parnokisa metetdaktsü.
2016 küm May 1 nü Chuchuyimlang yimdak yipru tulu arua kibong 85 ki raksa aser farm nung süngdonglidong raksar kibong 30 densema liasü. 2018 küma May 9 nü kasa yipru ajanga kibong 29 nung kiojen den süngdonglidong aika raksaba atalok. Item ajak indang kuli tejangja zülur nungdakba kaket ajak densema administration nem agütsüogo, ta paisa ashi.
Chuchu EAC office ajanga alima lendong balala ajurur nem teyari arua lir ta osang agütsü, anungji, iba osangji angashir pelaseta iba teyariji agizüki ao nung kibong shia jang bag kaka arua liasü. Ibajia jang bag shiaji senpak 150/- agi alitsüba indang liasü. Anungji, lendong mapang sen lakh aika jenjang rongsen samar shisabulua alidang, jang bag kaka aruba yabo kanga mepelar, ta paisa shisem.
2016 küm Salulamang nunga yipru ajanga ki 19 raksatsü, 2017 küma ki ka rongtok aser 2018 küm yipru ajanga ki ana raksatsü. Yaongyimti New nunga 2017 küm yipru agi ki 11 raksatsü. Yamaji Yaongyimti Old nunga 2015 küm ki ana rongtok, 2016 küma yipru agi ki 6 raksatsü aser 2018 nunga kasa lendong ataloka ki 7 raksa. Item tatalokba shiaji district administration-i tsüngtong arua semdangogo aser council-ia anepalua kuli tejangja bendener agütsüogo, saka tanü tashi teyari kecha mangur ta aliba mapang ka jang bag kaka ya aru, ta parnokisa ashi. Yim talangi bener aotsü pur atemabo jang bag kaji senpak 150/- agi alir yim atongdangbo kibong shia senpak 500-600/- shi adoktsü, ta parnokisa shisem.
Tang teyari arua alibaji govt. memo No. NSDMA/CMRF/22A/2018 ajanga aru, anungji, “Onoki mangatetba kaji iba teyari ya NSDMA nungi aru asü mesüra CMRF nungi aru?”, ta parnokisa asüngdanga ashi.
“Govt-i yaritsü ta angashia kanga pelaa liasü, saka sen lakh aika samaba atema teyari jang bag kaka agütsübaji kechi? Ya damasa air masü, iba amai ao nungbo Naga lima tali majungtsü”, ta Chuchuyimlang nung alir tambur kadi osangbener den jembidang ashi.