Chuchuyimlang EAC circle kübok VC pezüi sangdonger

Mokokchung, September 04 (TYO): Chuchuyimlang EAC administrative circle kübok yim pezüi 2015 aser 2016 küm lendong balala ajanga kongshiba kibong karibo Nagaland State Disaster Management Authority (NSDMA) / State Disaster Relief Fund (SDRF) nungi teyari manguba indang lepshia metetdaktsür, ta tanü Chuchuyimlang Village Council, Salulamang Village Council, Yaongyimti Village Council (Old) aser Yaongyimti Village Council (New) Chairman temi sangdong ka nung metetdaktsü.
2016 küm yipru mopung tesashi ajanga Chuchuyimlang yimdak alu, jendang aser süngdong lu mejungi raksatsüba ajanga takoksa angur kibong 32 aser Yaongyimti yimdak mi ajanga ki asem rongdokba sülen district administration den police-i tsüngdong arua asadangogo, ajisüaka tang tashi parnok kibongtem nem teyari magütsü, ta sangdong nung shia lir.
Relief jang agütsütsü atema tim department dang nungi documents meshia commissioner & secretary-i inyakba atema village councils-i pelar, ajisüaka India sorkari agütsüba SDRF kübok relief agütsüba atema onok terata mali mesüra SDRF nungi meimlar, ta parnoki ashi.
Village councils pezü aser alima lendong balala ajanga takoksa angurtem mepelar, kechiyong takoksa angurtem nem jang seret 50 agütsütsü atema documents nung o Nagaland State Disaster Management Authority (NSDMA) aser Chief Minister’s Relief Fund (CMRF) tetshia lir, aser iba anaji khenyongi balala, ta parnoki metetdaktsü.
“Parnok nem relief agütsüba atema councils aser takoksa angurtemi State Chief Minister dang pelar. Ajisüaka NSDMA/SDRF-i magütsü tashi relief magizüktsü atema parnoki lemtetogo, kechiyong 2018 küm May 9 nü iba tatalokba sülen küm ka dak tali süir,” ta parnoki metetdaktsü.
“Commissioner & secretary-i ashiba ama tim office/department-i relief atema sanction ser asütsüa akok saka 2018 küm tatalokba ajanga takoksa angurtemi tang tashi relief mangu. Anungji “additional relief” ta jembiba nungji tashishitsü lir aser yazü. Iba dak alia 2016 küm Chuchuyimlang nung takoksa angur karibo teyari sen 3000/- aser iba dang tajemba nguogo, saka 2016 küm Chuchuyimlang yimdak kasa takoksa angur 32-i teyari meshir liaka tanü tashi mangu,” ta sangdong nung shia lir. “Takoksa angur tenüng kar den takoksa anguba osang Chuchuyimlang Village Council-i district administration nem agütsü, ano takoksa angur indang documents karbo district administration-i inyak. Iba dak sendakba nung 2018 küm takoksa angur ajak nem relief agütsüogo, ta meshitettsü,” ta sangdong nungsa shia lir.