Chuchuyimlang nung CGM-i ATM lapoktsüogo

SBI Chuchuyimlang  Branch nung Brihostibarnü ATM lapoktsüba sentong nung CGM SBI NE Circle N. Murthy den SBI ketdangsertem  tangokba noksa ka yangi angur.  

Dimapur, March 17 (TYO) : Chuchuyimlang block nung alirtem aser National Highway 2 nung jajartem asoshi kanga anisüngzük mapa ka inyaktsüogo.
State Bank of India, Northeast Circle nung Chief General Manager (CGM), PVSL N. Murthy-i Chuchuyimlang nung aliba SBI branch nung Brihostibarnü ATM ka lapoktsüogo.
CGM den SBI NE Circle, Guwahati nung Circle Development Officer, S. Sinha, SBI, Jorhat nung Deputy General Manager, S. Malviya aser SBI Regional Branch Office Mokokchung nung Assistant General Manager, G. Sekar nungera iba sentong nung aden.
ATM lapokba sentong nung o jembidang CGM-i, iba ATM ajanga nüburtem ajak tajangzük angutsü imlar, ta ashi.
Paisa, tarutsü nung iba ATM booth nung SBI-i Swayam Machine enoktsütsü aser ibaji ajanga nüburtemi pei passbook pei sasa update sütettsü. Iba inyakyim ajanga bank nung nüngtepba ajema akümtsü aser ajak ajangzüktsü, ta metetdaktsü.
Dokan tem nunga mini ATM tem yutsütsü aser ibaji ajanga nüburtemi sen meyirjang ana tashi transact sütettsü, ta Murthy-i ashi.
Chuchuyimlang Village Council chairman, Aosanen Pongen-i o tatsüka jembidang, iba branch nung ATM amentsüba asoshi CGM aser SBI nung ketdangsertem dang kanga pelar aser iba ATM ajanga mapang talangka nungi yongyaseta aliba ama nüburtem tesem aika nung tajangzük angutsü, ta ashi.
Tamajunger nokdangtsü asoshi Council-i bank den amalitepa aser nungittepa inyaktsü, ta paisa ashi.
Kasa sentong nung NIELIT joint director Daniel Meren, I. Akang, DIS (Retd), Adhoc Town & Village Council member tem den public ishika dena liasü. Iba sentong ya SBI Chuchuyimlang branch manager Zulutoshi-i ketdang asü.