Chuchuyimlang nung ‘human development’ reju ka lapokogo

Union Minister of Human Resources Development, Government of India, Smriti Zubin Irani-i Chuchuyimlang nung ‘Mahatma Gandhi Academy of Human Development’ reju lapokba temaitsü lungzüng ka azüngtsür külen Nagaland CM TR Zeliang den par külem medemertem aser Nagaland Gandhi Ashram tenzüksang Natwar Takkar aser pa kinüngtsü densema külemi tangokba noksa nung angur. Chuchuyimlang, Oct 2, 2015

Chuchuyimlang, Oct 2: Hogulbarnü linük tebu Mahatma Gandhi asoba anogo den külemi Union Minister of Human Resources Development, Government of India, Smriti Zubin Irani-i Chuchuyimlang nung ‘Mahatma Gandhi Academy of Human Development’ reju lapokba temaitsü lungzüng ka azüngtsüogo.
Smriti Zubin Irani-i iba lungzüngji Nagaland Chief Minister T.R Zeliang den par külem medemer, sorkar tongti ketdangser, Tata Institute of Social Sciences Mumbai, putu yimsüsür aser lenla balala nungi lennirtem aika densema lapoktsü.
Sentong renemba apibo tanü iba sentongji anepdang 11:00 ako nungi tenzüktsüba liasü, aji saka, Union Minister Smriti Irani aser par telok pur ghonda ka dak tali menur aruba ajanga renema akaba sentong tera aritepa agi aser laia nüburtem den mapang peria magiteti oadok.
Irani-i Chuchuyimlang yimtak Amphitheatre nung minute asem shi agia jembidang, tanü anogo ya India aser alimai metetba nüngtugu nisung ana linük tebu Mahatma Gandhi aser taoba India ato kilonser Lal Bahadur Shastri tena tasoba anogo lir ta metetdaktsü.
Tawa India prime minister ajanga PMJDY ta ser koba nüburtem nem teyari agütsütsü asoshi mapatong ka tenzüktsüogo, iba ajanga India nung nüburtem tajangzük angutsü imlar, aji oda, nüburtemi iba maongkaji agitsüla ta laisa ashi.
Tetushi tesemdanger TR Zeliang-ia aritepa mapang tatsüka agidang, Nagaland Gandhi Ashram tenzüksang Wb. Natwar Thakkar-i taküm bendanga agüja taoba küm 60 tashi lokti mapa inyakba asoshi tenüngsang agütsüba den ibai nüburtem asoshi tayongzükba tulu ka lir ta metetdaktsü.
Mahatma Gandhi Academy of Human Development, Chuchuyimlang reju nung ya taküm 2015 November ita nungi diploma tenzüktsü aser sangküm 2016 nungi degree course-tem tenzüka aotsü ta osang ajanga angazüker. Iba reju ya Nagaland Gandhi Ashram aser Tata Institute of Social Sciences na senteper inyakba maparen ka lir.
Sentong nung Nagaland Gandhi Ashram tenzüksang Natwar-i Chuchuyimlang yimeri iba reju amenoktsü asoshi ali acres 232 tenlaba asoshi pelaba den yangi iba reju amenokba ajanga Nagaland aser Northeast asoshi education angudak tesepti ka akümtsü imlar ta metetdaktsü. Paisa Irani aser par telok pur menur aruba asoshi tesasaba olen ka lemsatep.
Chuchuyimlang aser ano kishikina yimtsüngtem nungi yar tsüngsangertem arua shilem balala agiba ajanga sentong tali meraketdaktsü.