Chuchuyimlang nung Noble Deeds Day among

Dimapur, October 9 (TYO): Mokokchung kübok Chuchuyimlang yimtsüng nung October 9, 2020 nü Padmashree Natwar Thakkar tasoba küm 88 ajungba benjung ayonga mongogo.
Padmashree Natwar Thakkar ya Nagaland Gandhi Ashram lapoksang liasü.
Pa tasoba anogomung ya Noble Deeds Day ta ser amongtsü ta Chuchuyimlang Village Council-i 2019 küm lemtet ka agir amonger.
1955 küm Gandhian social worker asür Natwar Thakkar-i Chuchuyimlang nung arua alitsü tenzük. Pai idakji Nagaland Gandhi Ashram lapoker Naga nunger tsüngda Gandhi tesayubatem nung ajemdaker yimjung aser lokti-rongsenkettsüng renloktsü atema mapa inyaka arur, October 7, 2018 nü alima nungi pila.
Nagaland Gandhi Ashram nung taküm Noble Deeds Day amongdang asür Natwar Thakkar nem tetushi agütsüba sentong ka agi.
Tanü iba sentong nung lokti lennirtem, arogo ketdangsertem aser Chuchuyimlang nungi sensotem aden. Iba anogomung nüngtem nung matamabensar nem Healthcare items aser Immuno-boosters lema agütsü.
Tanü The Hans Foundation, New Delhi-i Chuchuyimlang nung Old Age Home ka lapoktsü atema Rs. 5 lakhs tenla agütsü.
New Delhi nungi The Hans Foundation CEO, Lt. Gen. S.M. Mehta (Retd.)-i live video conference ka ajanga tenla agütsüba osang metetdaktsü.
Sentong nungsa taoba TISS, Mumbai Director aser Head of School of Social Work, Delhi University, Prof. R.R. Singh-i asür Thakkar den külemi inyaksema aruba bilemteta o jembi.
Ashram ajanga Chuchuyimlang nung Social Work Education programme inyakba ya Prof. R.R. Singh-i shisatetba maparen ka lir.
R.R. Singh-isa Nagaland Mahatma Gandhi University lapoktsü atema bendanga agüja inyaktsü ta nangzük.