Chuchuyimlang nung Noble Deeds Day mongogo

Chuchuyimlang, Mongputeni/October 09, 2019 (TYO): Chuchuyimlang nung October 9, 2019 nü mezüngbuba Noble Deeds Day sentong ayongzüka agia liasü. Padmashree award angusang asür Natwar Thakkar, shibai Gandhian mapatong nung taküm piyong nübur tenzüktsü asoshi nangzüka liasü, pa sor küm 87 ajungba bilemtettsü mechi iba sentong ayongzük.
Tawa October 2, 2019 nü Mahatma Gandhi sor küm 150 ajungba benjongmung agiba mapang, Village Council Chairman Ao Sanen Pongen-i Chuchuyimlang sensopur dang mapa tajung sayua maongka mangurtem ajangzükdaktsütsü asoshi küm shia iba anogo agiteta amungtsü mepishi aser ibayongji Noble Deeds Day anogo amungtsü telemtetba agia liasü.
Council-i lemtetba ya Gandhian mapatong nung bendanga agüja inyaker mongin Natwar, shiba nem ‘Nagaland Gandhi’ mesüra ‘Mahatma’s Apostle’ nüngja agütsü, pa nem tetushi agütsüba sentong tetemjen ka asütsü.
Iba sentong ya Nagaland Gandhi Ashram nung ayongzüka liasü, kong nübur ajaki arua shilem agiba den külemi lenir (Natwar Thakkar) nem aküm tetushi agüja liasü. Sentong agiba sülen blood donation camp ka ayongzük, kong lanurtemi kanga dang mulunga azü tenla agütsü.
Ano külen, Jorhat Lions Eye Hospital den lungjemer angati eye screening camp sentong ayongzükja liasü. Tenük tendangtsü atema nisung jenti aruba ajanga, iba sentong anogo ka atsülangja liasü, ta sangdong ajanga metetdaktsü.
Natwar Thakkar ya Gujarat nunger aser pai 1955 küm Chuchuyimlang nung Nagaland Gandhi Ashram tenzükja liasü. Pai Chuchuyimlang nung nüknürar ajurua kibong kümer idakji lia küm 60 dak tema lokti tenzükba wadang nung shilem agi aser October 7, 2018 nü pa iba akümli wadang toktsür oadok.
Maneni sentong nung Arogo tenzüker, lanur, tetsür telok aser yimtsü yimbotem den külemi Chuchuyimlang administrative telungtet nungi tanga Village Councils aser Town Committees 10 aruagi denogo. Iba Ashram inyakyim ya maneni Thakkar kinungtsü aser Padmashree angula Lentina Ao Thakkar-i achaayangdar.