Chuchuyimlang nung tesayur anogo den 1st Immakmangyang Award agütsü

Chuchuyimlang, Sept 5 (TYO): Chuchuyimlang Village Education Committee-i ayongzüka Teachers’ Day den repsema mezüngbuba asür Immakmangyang nüngtem award agütsüba sentong tajung ka Honibarnü yangi GMS Longzüng Chuchuyimlang nung meraketa agiogo.

Iba sentong nung Chuchuyimlang nung aliba school pezü GPS Imlang, GMS Longzüng, GPS Impang aser GPS Mongda nungi school tanurtem den tesayur aser yangji inyakertem, Education department nungi, Chuchuyimlang Village Education Committee pur, Chuchuyimlang yimten aser senso mungdang aser lenla balala nungi teshimtet nübutem arua shilem agia dena liasü.

Taküm mezüngbuba Immakmangyang Award (for excellence in teaching) senpetji GPS Mongda nungi tesayur Wt. Losangnaroi agizük. La nem senpet sen meyi pungu (5000/-) den nüngo tajung ka agütsüogo. La ya Changkitsür aser 2013 nungi GPS Mongda nung inyaker ta angazüker.

Losangnaroi iba konang aketba senpetji agizükdang lai tayonger den asür Immakmangyang’er kinüngertem nem tenüngsang agütsü aser lar kinünger den Tsüngrem nem tetushi agüja liasü.

‘Immakmangyang Award’ ya tesayuba nung tajungtiba akümtsü asoshi aser bendanga agüja tatishitsü kaa sayur nem iba senpet agütsütsü nükjidong nung tenzük. Iba den ano Chuchuyimlang nung tesayurtem tsüngda tajungtiba akümtsü aser tetoktepba nela kadaktsütsü aser tesayuba jenjang ajungketba ajanga kaket shisatsü tejakleni aotsü nükjidong yur tenzükba lir.

Chuchuyimlang nunger asür Immakmangyang ya par yimer aser Langpangkong nung shisaliok luyim tsütsü terenlok kadaktsüba nung shilem tulu agir mezüngpur rongnung ka lir. Ibaji dang pai lokti balala nung shilem tajung agiba pa otsü ajanga angazüker. Immakmangyanger’er chirnur tang taküm alir parnok 7 rongnung jabaso 1 aser jala 6 den semshir 34 moaja lir.

Iba kasa sentong nung asür Immakmangyang (1916-1982) taküm otsü kaket tenüng agi “A PIONEER IN EDUCATION DEVELOPMENT” ta ser Village Education Committee (VEC) Chuchuyimlangi adokba ka E.A.C Chuchuyimlang Sp. Meyazüngbai sayatsüogo.

Award agizükla Losangnaro ya lanuwa nungi tesayur ka akümtsü tejangraba liasü, aji oda, 2004 nungi Edith Douglas Hr. Sec. School nung tesayur küm 9 shi inyaker 2013 nungi GPS Mongda nung inyaker ta iba osangbeneri sentong temer külen la den jembidang lai ashi. Tesayur akümtsü asoshi tejangraba anguba indang lemsatepdang, la Children School Mokokchung nung class 6 azüngdang lar tesayur ka tenüng agi ‘Ainla’ ta ser ka liasü, la ajanga “tesayur inyaktsü tejangrabaji angu” ta lai ashi.

“Yimtsüng ka nung tesayur inyaktsübaji temela masü, kechiyong yangi alir kibongtemji teimba koda masürtem dang, iba den ano tsüraburtemi kaket shisaliok bushiba maparen nung pei chirnurtem junga anepalu masüba ajanga tesayurtem talila bülemtsüsa akümer” ta lai ashi. Aji saka, “tanurtem tangazüknüba tanela angudang sayutsü tejangraba arur aser tali tashi itshir” ta laisa shisem.

“Na atema education-ji kechi?” ta metetnüa asüngdangdang, “tanur aser tesayur na pronglaji tangazüker lir, kechiyong education yabo maneni aoba maparen lir” ta langzü.

“Na atema tesayur ka dak koba noklem (qualities)-temsa alitsüla?” ta metetnüa asüngdangdang, “tesayur kaji tasen-tasen purapitetba, tanurtem azüoktetba, tanur den medemer akümba, tai inyakdang marendaki/metsübui metongshitsüba aser adventure terabo alitsüla” ta lai ashi.

Tanü sentong nung Education department Mokokchung, Chuchuyimlang Senso Mungdang, Putu Menden Chuchuyimlang, Bendang Alir Chuchuyimlang Union nungi meyongertem, Nagaland Gandhi Ashram founder Secretary Natwar Thakkar parnoki o tatsütsü jembi.

VEC mendenbuba Lanumatongi tarur ajak pela agizük, Immakmangyang kinünger nungi Obangwatii jembi, Teacher Day amungba teratet I.Akang (Rtd DIS)-i bener aru aser Immakmangyang Award indang Latongwatii tatsüka lemsatep. Award agütsüba maparen Award Committee mendenbula Wt. Ketimenlai ketdang süa liasü.