Chuchuyimlang town kümteter küm 50 jungogo

Mokokchung, April 4 (TYO): Chuchuyimlang Town kümteter küm tenem (50) ajungba hon jubilee sentong ka Langpangkong Government High School Chuchuyimlang nung ayongzüka mungogo.
Iba sentong nung tetushi tesemdanger, Nagaland PWD Minister, Tongpang Ozüküm-i jembidang, iba town ya nükla tulu yur kümteta yutsür mezüng tenzüker tsüraburtem den ano Langpangkong Govt. High School asütsü atema ali kimung tenlartem aser tang lenla balala nung tenzüker ajak nem tenüngsang tetushi agütsü.
Nagaland nung Chuchuyimlang town ya mezüng town kümteter rongnung ka lir, iba ya tejakleni meraa aoba town ka aser ibai Naga nunger arok meyong town ka lir, ta ashi.
Paisa asür N. Thakkar tenüng sanga ashidang, “pa Chuchuyimlang limai aruba ya Tsüngremer sentong lir”, ta ashi.
Iba town renloka bener aotsübaji nisung shiai shilem agi nung dang tejakleni aotsü, anungji, iba tangatetbaji nisung shia dak lidaktsünür, ta paisa inyakdaktsünüba o ka ashi.
“Taoba mapang meputepba kar danga lira, tila kümer iba jubilee amungba ajanga taitokteper lungjemdi aser putepshidi arung”, ta paisa tayongzükba ka agütsü. Jubilee-ji zübazüba masü saka chichiba nung amungtsü asoshi ta paisa ayongzük.
Tetushi tesemdanger Tongpang Ozüküm-isa maongka agia Chuchuyimlang Town kümteter küm 50 ajungba jubilee nüngtem adokba nüngo kaket ka dena sayatsü.
Sentong nung special invitee Mokokchung Urban Development Officer Solesül Tholre, Langpangkong Tzükong Mungdang President M. Zülu Ozüküm, Mongsenyimti Village Council Chairman Limainba, Chuchuyimlang Village Council Secretary Tsükjemtangit, Urban Station Committee Chuchuyimlang Town Vice Chairman I. Zülutemba, Rev. Temjen parnoki shilem balala agia liasü. Iba sentong nung Akum Pongen menden liasü aser Chuchuyimlang Town Watsü Unit ajanga ken tajung aten.