Chuchuyimlang yimtak tesayur anogo den 2nd Immakmangyang Award agütsüba sentong agi

Chuchuyimlang, Sep 5 (TYO): September 5 ya India lima tesem balala nung tesayur anogo amungba den külemi Chuchuyimlang nunga Chuchuyimlang Village Education Committee-i ayongzüka tesayur anogo agütsüba den repsema tanabuba Immakmangyang Award agütsüba sentong kanga meraketa agiogo.
Taküm Immakmangyang Award for Excellence in teaching senpet-ji Chuchuyimlang nunger Wb. Lanunungsang’er jala Govt. Primary School Mongta nung inyaker Wt. Sanentulai agizük. La nem senpet sen den nüngo kaket tajung ka agütsüogo.
Iba award ya Chuchuyimlang telungtet nung aliba sorkar school nungi nendaka inyaker tesayur tajungtiba ka shima agütsür. Lokti asoshi tesayurtemi tamaren mapa inyakbaji tushitsü nüngdakba ajiteta Chuchuyimlang VEC-i achaayanga iba award ya taküm agi kümnabuba agüja arudaki.
Tsürabur Immakmangyang ya Chuchuyimlang nunger Punasütsüng aser Rongsenkümla na jabaso lir. Pa October 1916 nung aso. Pa ya kaket riju nung alir mezüngpur rongnung ka lir. Pa yimtak mission school, Impur aser Jorhat high school nung azüng. Pa ya tenendak tesayur ka liasü, ta angazüker.
Pa Jorhat high school nung zünga lia putu yimsüsürtemi pa dang pei yimtsüng nung tesayur inyaktsü asüngdang. Aji oda, school züngnüaka pai yimsüsür o meindoktsütetba den paia pei nübur tenzüktsü mulungteta yimtak arua tesayur mapa inyak. Pai talisa shisaliok luyim tsütsü shilem tulu agiba den lenla balala nung temelenshi jenti bener arutsüba pa otsü ajanga angazüker.
Tanü iba osangbeneri award agizükla Wt. Sanentula dang ‘nai iba award agizükba ya koma bilemer?’ ta metetnüa asüngdangdang, ‘iba yagi ni ano tali tashi itshir aser tajungba inyaktsü tajungshiba angur’, ta lai langzüa liasü.
‘Nai kechiba tesayur mapa ya shim?’ ta asüngdangdang, “kübu ya tesayur ka liasü, pa ya ni asoshi tesayur tajungtiba, medemer tajungtiba aser pa ya tajungshir tajungtiba ka lir, pa nungi ni tesayur ka akümtsü tejangraba angu’, ta lai ashi.
‘Yimtak tesayur mapa inyaktsübaji nai koma bilemer?’ ta asüngdangdang, yimtak tanurtemji teimba aluyimer chirtem dang asünung, khenkenbo tezüdangba ajurur. Aji süaka, tanurtem angazüknüba tejangrabaji ngua item ajakji amadoker aser pela bilemer’, ta laisa ashi.
‘Naia tesayur ka dak noklem (qualities) kechisa alitsü nüngdaker?’, ta metetnüa asüngdangdang, ‘mulungsentsü tajung (positive mindset), jirapera/apitetba (creative) aser teinyaktsü khuret metetba itemji alitsüla’, ta lai ashi.
‘Nai tesayurtem dang teshinüba kar ali asü?’ ta asüngdangdang, ‘pei mapa angateta shitak inyaktsüla aser tanurtemji amokmerena masü saka parnok tekolok shisatsü meteta timleni anitsüla aser lenji oa inyakdaktsüner’, ta laisa ayongzüka ashi.
Tanü iba sentong nung Directorate of School Education Kohima nungi Dy. Director Wt. Temjennaro, SMA (SSA) Kohima nungi Dy. Mission Director Wb. Khukiye Sema, Jt. Director (NIELIT Chuchu town) Er. Daniel Meren, Chuchuyimlang Council Chairman Wb. Aosanen Pongen, VEC chairman Wb. Lanumatong, Wb. Odimatsüng (Rtd. Jt. Director), Award Committee Convener Wb. I.Akang Longchar (Rtd. DIS), VEC züngsem Wb. Longjang nungertemi tepela o den tayongzükba o tulu bener arua tesentepertem ajungmesoa liasü.
Iba sentong nung Chuchuyimlang yim lushi nung aliba GMS Longzüng, GPS Impang, GPS Imlang aser GPS Mongta nungi tesayur aser school tanurtem arua shilem balala agia aden.