Chuchuyimpang kaketshirtemi nübo tsüka lenmang yanglua amunger

Chuchuyimpang, Mongputeni/October 15 (TYO): Chuchuyimpang yim süngküm nungi Fazl Ali College (FAC) tashi gari lenmang kanga majungba ajanga yimer aser kaketshirtem timtemba ngua Chuchuyimpang Kaketshir Telongjem (CKT)-i Oct 12 nungi tenzüka tanü agi anogo asemnübuba angati nübu tsüka kilometer ka shi nung lenmang aser kilentsü raksar aliba tesemtem yanglushia mungdaki.
Iba lenmang ya PWD-i repranger saka department-i 2013 küm yangluba sülen küm aika meyanglui toktsübayong joko kanga mejungi raksaogo. Iba ya yimertem atema tongtibang lenmang ka dang masü saka yangi state nung college tejentiba amenoka lir, anungji, “arok ajangzüktsü” nükjidong yur Chuchuyimpang kaketshirtemi ibai yanglushitsü lemtet, ta CKT tir, Kilenzülui osangbenertem den jembidang lemsatep.
Iba maparen inyakdang Chuchuyimpang putu menden den VDB, Arogo aser temulungertemi tenla balala agüja yaritepba asoshi parnok ajak dang CKT lenirtemi pelaba ashi. Talisa Mongoya Construction Proprietor, Sanen Sempo-i lenmang yangludang amshiba nüngdakbatem tenla tulu agüja yariba asoshi pa danga kanga pelar, ta parnokisa shisem.