Chuchuyimpang nung 2 buba S.S. Moa badminton asayamong akar

Mokokchung, December 17 (TYO): Chuchyimpang yimtsüng community hall nung 2 buba S.S. Moa badminton asayamong tanü Brehostibar nü tenzükogo.
Lanur badminton asayartem ajungmesotsü nükjidong nung Shuttlers Chuchuyimpang teloki ayongba asayamong nung tebur doubles aser mixed doubles shilem lemsar toktepa asayatsü tenzüka lir.
Asayar 17-i toktepa shilem agiba sülen mezüngbuba aser tanabuba jenjang angur nem senpet den kulikaket agütsütsü renema lir.
“Asayamong ka ayongtsüji mapa temela masü saka Shutters teloki lanurtem atema sabang tajung renemtsüba atema par telok dang pelaba metetdaktsür. Iba asayamong ayongba ajanga lanur tajung aika adoktsü imlar,” ta tanü asayamong lapoktsüdang, tongti tesemdanger, Block Development Officer (DBO), Kazüpokbai-i metetdaktsü.
“Asayar ajakibo takokba mangur anungji, asayartemi tamakok angudang kasaji takok tongshi ka kümdakja tali meranga asayatsü ajungshir,” ta pai tajungshiba olen ka lemsatep.
Asayartemi asaya temzüng ozüng benshia yimya tajungtiba nung shilem agitsü ajungshir ta paisa shisem.
“Iba asayamong ya tarutsü anogotem nung Open asayamong ka küma ayongzüktsü sentong lir,” ta Shuttlers Chuchuyimpang Tir, Arentemsü-ia metetdaktsü.
Tanü sentong nung Chuchuyimpang Village Council Chairman, S.R Temsüi-a tayongzükba o tulu bener arua asayartem ayongzüka liasü.