Chuchuyimpang nung tila tanurtemi yi anema yimyim ayima jaja

August 1, 2015 nü Chuchuyimpang Baptist Arogo Christian Education Ministry tanurtemi yimdong nung yi anema sentong agia senzüdang agiba noksa angur.

Chuchuyimpang, August 01 : Chuchuyimpang yimtak Chuchuyimpang Baptist Arogo Christian Education Ministry nungi tila tanur 300 shi kati “Yi Anema Rara” ta asüba Omen nung ajemdaker August 1 anepdang yimtsüng telungtet nung Yi anema ola adoka yimyim ayima jajaogo.
Tila tanurtemi kaket balala nung ” Yi ajemba ajanga Kibong nung teraksa adokdaktsür”, “Oya, Odi, Oja aser Oba yi ki masü sentep ki bushiang”, “Ozu lima tarutsu putu yi ajanga teraksatsü”, ” Yi ajemba aser yi ayokba ajanga kibong aser alima raksatsür”, “Yi ajemba aser yi ayokba ajanga kibong nung balalula adokdaktsür”, “Yi ajemba nung sen indoktsü melen onok school fee shitak agüjang” ta ama mesükba o zülua bener yimyim ayima sarasadema jaja-a liasü.
Chuchuyimpang yimtak Christian Education Ministry ajanga yi anema noktakba mapatong taküm agi küm 4 buba inyaka arur aser iba mapa ya ajanga yimtsüng nung aliba kija takum aser kibong nung temelenshi adokba khuli tajung lir. Küm shia tila tanurtemi iba sentong ya Moatsü aser Tsüngremmung benjung amungdang amangbapur rongnungi mangatetbapuri yi ajemtsü nungi jenbua alitsü asoshi yimyim agüja ola adoka inyakba mapatong ka lir.
Christian Education Director S.Aienla-i ashiba agi, küm pezü tejaklen iba sentong kanga dang sarasadema tenzük aser tila tanurtemi iba mapa inyakba anogo nung Tsüngremi kanga dang jungkai adoka semdanga iba maparen takok ngudaktsüba khuli tajung aika dang lir, anungji iba ya Tsüngremi mulungba mapa ka alitsü ta asüba tamang nung iba yi anema ola adokba maparen ano maneni inyaka aotsü sarasadema atar.